La primer ufierta d’Educación recueye 110 places pa les oposiciones d’esti añu

El Gobiernu asturianu va convocar esti añu oposiciones a los estremaos cuerpos docentes. Anque entovía nun se sabe cuál va ser la ufierta definitiva, la primer propuesta de l'alministración que se-yos presentó ayeri a los sindicatos del ramu nel marcu de la mesa técnica de negociación inxerta 77 places en secundaria, 13 en Formación Profesional, 3 pa les escueles d'idiomes, 10 de música y artes escéniques y 7 d'artes plástiques y diseñu.

El primer borrador col que trabaya la Conseyería d'Educación propón un mínimu de 5 places en cada especialidá que se convoca pa secundaria, siendo estes les places que s'ufiertaríen pa Intervención Sociocomunitaria, Formación y Orientación Llaboral, Tecnoloxía, Educación Física, Música, Inglés, Francés, Matemátiques, Historia y Filosofía, mientres que pa Sicoloxía convocaríense 6 places nueves, 7 pa Llingua Castellana y Sicoloxía y 8 pa la especialidá de Dibuxu. Pal cuerpu docente de Formación Profesional, la conseyería que dirixe Iglesias Riopedre propón 2 places de Peluquería, 5 de Servicios a la Comunidá y 6 de Caltenimientu de Vehículos. Nel casu de les Escueles d'Idiomes la ufierta ye de trés places pa poner clas d'Alemán, y nel de Música y Artes Escéniques pidiríense 2 profesores de Guitarra, 3 d'Interpretación y 5 de Pianu. No tocante a Artes Plástiques y Diseñu Educación propón 2 places de Medios Informáticos, otres 2 de Dibuxu Artísticu y Color y 3 de Conservación y Restauración d'Obres Pictóriques.

Los sindicatos d'Enseñanza ven la ufierta d'Educación con delles reserves, y asina SUATEA llama l'atención sobre les "peculiaridaes" que-y abulta que tien la convocatoria y que se refieren a la situación que va carecer el colectivu d'interinos nesta convocatoria d'oposiciones. SUATEA denuncia que, mientres qu'ello lleven años trabayando pa que se dea un accesu a la Función Docente nel que cuenten los méritos de los interinos con más esperiencia p'afayar un accesu escalonáu a la profesión, los demás sindicatos d'enseñanza roblaron un alcuerdu cola alministración que dicen que nun va suponer avance nengún nesti sentíu. SUATEA llamenta que'l Decretu que tien d'apautar d'agora en p'alantre l'accesu de los interinos a la Función Pública entovía ta por conocese, y, anque nun albidra que vaya contentar les sos demandes, alvierte de que'l retrasu ta llevando a confusión ente los interinos porque, a cuatro meses de que se convoquen les oposiciones, nun saben por qué sistema va facese.