La Primer Sidre l'Añu torna adaptada a la situación sanitaria

Tamién va desendolcase'l Sidracrucis esti vienres en siete chigres de Xixón. Huerces resultó escoyida Meyor Primer Sidre l'Añu.

Depués del parón obligáu del añu pasáu pol confinamientu, torna la Primer Sidre l'Añu a la so cita habitual de Selmana Santa. La Fundación Asturies XXI, editora de la revista 'La sidra', dada la situación sanitaria nun va poder entamar la espicha del tendayu del Muséu del Pueblu d'Asturies, pero tien preparada pa esta undécima edición actividaes telemátiques y presenciales.

El recintu museísticu va acoyer mañana a les 12.30 hores la inauguración del Primer Sidre l'Añu, que se tresllada al llagar de la instalación. José Antonio Norniella, de Sidra Huerces, va recibir el Premiu a la Meyor Primer Sidre l'Añu, mentes qu'Alejandra Venegas, de la sidrería La Montera Picona de Ramón, va echar el culín inaugural.

El vienres, de 12 a 20 hores, va celebrase un Sidracrucis adaptáu a la situación actual. Los participantes podrán dir en grupos de non más de cuatro persones a siete chigres que van contar cola ganadora Sidra Huerces ensin trasegar (Tírate al Matu, Poniente, Jaime, El Parque, La Montera Picona de Ramón, El Centenario y El Veleru) onde, tres una inscripción de 5 euros, van recibir una mázcara y una etiqueta conmerativa, un carné del Sidracrucis, un mapa de Xixón coles sidreríes participantes y una botella d'Huerces, siendo les restantes de pagu en cada establecimientu.

Preba guiada

El Duque va acoyer el sábadu una preba a les 16.30 hores na que los asistentes van poder tomar les cinco primeres del concursu La Meyor Primer Sidre L’Añu’ (Huerces, Viuda de Angelón, Riestra, M. Vigón y la DOP Ramos del Valle), que contó cola participación de 38 productores, amás de la propia del llagar y d'El Piloñu, y una sidra natural ensin alcohol. Norniella va encargase de guiar esta preba que va poder siguise per Internet.

El IX Concursu de Sidre Casero fecho en Maera tampoco nun se va perder y va tener llugar el domingu a les 12.30 hores. Nél pueden participar ellaboradores non profesionales de tol país y tien l'oxetivu de recupera la tradición de facer sidra en pipes de madera.

L'actividá telemática va completase col certame de tonada ‘Asturianada y Sidre’, pa lo que la organización tien preparada una llista de reproducción específica en YouTube con interpretaciones de canciones asturianes venceyaes cola sidra.

Na semeya, xuraos del Meyor Primer Sidre L'Añu 2021 Manuel Castro, Joaquín Fernández, Ana María Viciosa, Luis Ceferino y Manuel G. Busto, con Cristina Norniella, en representación de la ganadora Sidra Huerces, con montera picona.