La Primer Sidre l'Añu cambia d'allugamientu

Carlos Rubiera va lleer el pregón d'esta cita que recupera la tradición de les espiches d'esti tiempu pa prebar la sidra nuevo.

Depués de trece ediciones nel tendayu del Muséu del Pueblu d'Asturies, la Primer Sidre l'Añu vese obligada a cambiar d'allugamientu. L'Atalaya va ser el nuevu llugar onde los asistentes van poder beber el productu de 40 llagares, participar en tasties guiaes y talleres, y disfrutar de la música asturiana y de deportes tradicionales dende mañana al domingu.

Esti cambiu vien pola negativa del Conceyu de conceder el permisu pa celebralu nel recintu museísticu por un informe negativu de la direición basándose na Llei d'Atención Integral en Materia de Drogues y Bébores Alcohóliques del 2015, lo qu'obligó a la Fundación Asturies XXI a buscar alternativa nun curtiu espaciu de tiempu. La propuesta del Parque Inglés tampoco foi aceptada, polo que finalmente la Primer Sidre l'Añu va celebrase en Cimavilla.

Una de les consecuencies d'esti movimientu ye que'l preciu de la entrada a la espicha llibre xube a los 10 euros. L'horariu d'apertura del recintu va ser de 12 a 21.30 hores, a les 18 hores el domingu, mentes que la inauguración ta prevista mañana a les 13 hores cola llectura de pregón por parte de Rubiera y la entrega de los premios del Concursu de la Primer Sidre l'Añu.

Prado y Pedregal

El llagar ganador d'esti añu foi La Morena cola so DOP Prado y Pedregal, que se convierte asina na sidra oficial de la XIV Primer Sidre l'Añu per tercera ocasión. Ésti será ún de los palos más solicitaos na barra de la carpa instalada en L'Atalaya, onde tamién s'echa la sidra ensin trasegar de los otros seis finalistes, esto ye, Germán, Fonciello, Peñón, Quelo, Alonso  y Cabueñes, y d'otros munchos más.

Na semeya, ambiente na edición pasada nel tendayu del Pueblu d'Asturies.