La primer actividá de la XV Fiesta de la Oficialidá de Bimenes principia esti miércoles

Una esposición de los trabayos participantes nel VII Concursu de Cómic n’Asturianu de la Mancomunidá de la Sidra va abrir la XV Fiesta de la Oficialidá de la Llingua Asturiana de Bimenes. La muestra va zarrar les sos puertes el 6 de xunetu.
 
La inauguración de la esposición d’esti concursu, que se llevó’l mierense José Juan González García con ‘Nel día de la victoria’, va producise a les 16 hores na Casa la Cultura de Santuyano, onde va poder visitase la muestra n’horariu de 16 a 20 hores hasta’l 6 de xunetu. Con esta actividá, na que collaboren los Servicios de Normalización Llingüística y de Cultura y Mocedá de la Mancomunidá de la Sidra, entama la XV Fiesta de la Oficialidá de la Llingua Asturiana, que va tener los sos díes grandes el 1 y el 2 de xunetu.
 
L’actu  próxima que va desarrollase dientro d’estes xornaes festives va celebrase’l llunes, a les 19.30 hores tamién na Casa la Cultura de Santuyano, y va consistir na presentación del llibru ‘Cánigu lliterariu’, una llectura de testos na llingua’l país por parte d’autores de la zona y l’apertura de pliques del XIV Concursu de Cuentos pola Oficialidá del Asturianu.