La posición de Sánchez divide a la FSA-PSOE

Pedro Sánchez, secretariu xeneral del PSOE, anunció na xornada posterior al fracasu nes eleiciones gallegues y vasques, la convocatoria d'un Congresu del partíu y la so intención d'intentar formar gobiernu. Esta decisión del líder socialista divide a la FSA pese a l'ausencia de declaraciones públiques al respeuto.

Adriana Lastra y María Luisa Cardedo destáquense como les principales defensores de la estratexa de Sánchez dientro de la federación asturiana, onde'l secretariu xeneral y presidente del país, Javier Fernández, paez decantase pola opción de la astención nuna investidura de Mariano Rajoy pa nun forciar unes terceres eleiciones, una postura que compartiría la mayoría de la direición del partíu n'Asturies. Queda por ver cómo la militancia recibiría dexar en bandexa a la derecha'l Gobiernu del Estáu, una midida en principio impopular.

Pela so parte, Sánchez, en declaraciones a la Cadena SER esta mañana, afaló a los barones del partíu a posicionase abiertamente a favor de l'astención o non, al tiempu que negó la posibilidá de que presente la so dimisión. "¿Por qué llamen reflexón a lo que ye l'astensión?", aseguró.

Ganó la "estabilidá"

Fernando Lastra, voceru del PSOE na Xunta Xeneral, valoró los resultaos del domingu en Galicia y Euskadi del so partíu como "un mal resultáu", dalgo que "sería cínico nun reconocer". D'igual forma, apuntó que nos dos países ganaron les propuestes que presentaben "la estabilidá, la rigurosidá, la seriedá y la gobernabilidá", en referencia al PP y l'EAJ-PNV, de manera respeutiva.