La Policía denuncia a dos sindicalistes de SUATEA por "insultar a l’autoridá"

Los sindicalistes Beatriz Quirós, portavoz del sindicatu d'enseñanza SUATEA y presidenta de la Xunta de Personal Docente non Universitariu d'Asturies y Jesús de la Roza, secretariu d'esta mesma Xunta de Personal Docente, recibieron esta selmana una denuncia del Cuerpu Nacional de Policía acusándolos de mostrar una "actitú airada y dando voces insultando a l'autoridá" nel marcu de la protesta que fexeron estudiantes y profesores contra la cesión d'espacios na Universidá Llaboral a la empresa Thyssen-Krupp que tuvo llugar na inauguración, el pasáu 16 de xineru, de la Escuela Superior d'Arte Dramáticu (ESAD). Na denuncia acúsase a Beatriz Quirós y a Jesús de la Roza de francer el cordón policial que resguardaba a les autoridaes participantes nel actu.

Dende SUATEA asegúrase que la concentración foi absolutamente tranquila y qu'había "abondante presencia de medios de comunicación que recoyeríen ualquier tipu d'incidente en casu de llegar a producise". Según un comunicáu unviau dende SUATEA "dambos delegaos quedaron sorprendíos cuando la policía los abordó al dir a abandonar el llugar ensin alegar causa dalguna". La sorpresa foi inda mayor cuando los dos sindicalistes recibieron llamáu pa presentase a un xuiciu por faltes que va celebrase'l 2 de marzu, a les 10.00 hores.

Asturies.com pudo falar con Beatriz Quirós. La sindicalista desconoz pel momentu la multa o castigu que se-y pide, pero nun dexa de comparar la so situación, salvando les distancies, cola de los sindicalistes de CSI Juan Manuel Martínez Morala y Cándido Carnero. La portavoz de SUATEA negó toles acusaciones que se faen contra ella y de La Roza y denunció que la policía nun-y quixo almitir el carné de conducir como mediu válidu pa identificase cuando ella alvirtiere que nun disponía de DNI porque-y lu robaren en Barcelona.