La Pola Siero va vivir cuatro díes de conciertos na plaza Les Campes

Les III Xornaes de Música na Cai en La Pola Siero van celebrase del 21 al 24 de xunetu cola participación d’ocho grupos de dellos estilos musicales. Tolos conciertos van celebrase na plaza Les Campes a partir de les 20 hores.
 
N’Ochebre, grupu de folk-rock qu’emplega l’asturianu, va inaugurar les xornaes el xueves 21 xunto con Alvarito & Pi. Esta banda llocal tien trés años de vida y busca amestar soníos tradicionales col rock y el metal. Una apuesta interesante pola que paga la pena averase a La Pola pa presenciar el conciertu inaugural d’esta iniciativa entamada pola Asociación Cultural Ruiu Nora cola collaboración de la Fundación Cultural de Siero.
 
Los conciertos van continuar el vienres cola actuación del grupu ‘heavy’ Scär y Lavandera, banda que fai pop. El sábadu’l turnu va ser pa los rockeros Kursk y Blackout, pa finar el domingu, col rap de MNR y el punk d’Expropiazion. Tolos conciertos van tar amenizaos por Teatroncho.