La Pola Siero celebra los Güevos Pintos

La Pola Siero celebra güei el día grande de la fiesta de los Güevos Pintos, una fiesta qu'enllena les cais de La Pola de tenderetes que venden güevos pintaos artesanalmente con toa triba de motivos, dende los relixosos a otros más profanos como les escenes de Pinón y Telva. Nun se sabe seguro por qué esta fiesta, tan rara de ver en tola península, se celebra en Siero y tamién en Llangréu, pero ye bien fácil que'l so aniciu tenga que ver cola revolución industrial. Ello ye qu'a Siero y Llangréu, los dos conceyos en qu'entamó la minería moderno del carbón n'Asturies, llegaron nel sieglu XIX a trabayar na mina cantidá d'inxenieros y personal especializao d'otros llugares onde sí se fai la tradición de los güevos, asina que lo más seguro ye que la fiesta viniere con ellos.

Los Güevos Pintos son una celebración de la entrada de la primavera asimilada pol cristianismu como conmemoración de la resurrección de Cristo que se celebra per tol mundu, dende Francia hasta Australia, pasando per llugares como Grecia, onde pinten los güevos d'un color encarnao fuerte. Quiciás les muestres más espectaculares de güevos de Pascua seyan les que vienen de Rusia y Ucrania, onde la decoración de los güevos (pysanky) llega a un nivel de complicación técnica enorme, teniendo qu'echar los artesanos delles capes de cera y pintura enriba la cáscara. En Rusia, por poner un casu, guárdense tamién colecciones de güevos pintos de porcelana , oxetos d'ostentación que pertenecieron a la familia real.