La Pola Siero acueye’l sábadu la entrega de los premios a los meyores blogues n’asturianu

La Casa la Cultura va ser la sede del III Sidra y Blogues, certame onde van premiase los meyores blogues n’asturianu. Delles charres y una espicha van completar el programa d’esta cita entamada pola Xunta de Blogues en Llingua Asturiana.
 
L’actu va principiar a les 17 hores cola presentación del Firefox 4 por parte del coleutivu Softastur, pa depués dar pasu a una charra de Mikel González, que va falar de ‘Un añu na rede de Ximielga.me’, y otra de Mar Martín sobre la ‘Biblioteca virtual María Xosefa Xovellanos’. Tres estes intervenciones, van dase a conocer los ganadores a los meyores blogs en tres categoríes: meyor conteníu, meyor diseñu y meyor blogue. Na edición del añu pasáu los vencedores foron ‘Fueya en Blanco’, ‘González y González’ y ‘Conceyu Nacional de Liriu’, respeutivamente. Hai que destacar que los premios a los meyores blogues n’asturianu son otorgaos polos propios internautes: nel casu de les dos primeres categoríes, polos autores de blogues, y na del meyor blogue, polos llectores. Pa finar el III Sidre y Blogue, y pa facer honor al nome, va celebrase una espicha nel Abre César na que van participar tolos asistentes. La hora prevista pal so empiezu ye les 19 hores.
 
Ésta ye la primer vez que La Pola Siero va acoyer el Sidre y Blogues, certame que dio los sos primeros pasos n’Uviéu nel 2007, pero que tuvo la so consolidación l’añu pasáu en Ciañu col formatu actual. La Xunta de Blogues en Llingua Asturiana, formada tres la primer edición del Sidre y Blogues, pretende dar conteníu y ambiente participativu y festivu al premiu al Meyor Blogue, que tamién va pola so tercer edición.