La política llingüística va depender del conseyeru de manera direuta

Nun va haber viceconseyería finalmente. La so denominación va ser Planificación Llingüística y Normalización, con competencies n’educación, y el so responsable, a falta de confirmación oficial, será Fernando Padilla.

D’esta forma, la política llingüística del Gobiernu dexa de depender de la viceconseyería de Cultura –hasta la fecha ocupada por Alejandro Calvo– pa facelo del propiu conseyeru d’Educación y Cultura, Genaro Alonso. Tovía como direición xeneral, pasa a tener el nome de Planificación Llingüística y Normalización, con mayores competencies y funciones, que tienen que ver cola presencia del asturianu na educación y l’alministración, asina como nos medios de comunicación, según confirmó ayeri Gaspar Llamazares.

El voceru d’Izquierda Xunida (IX) na Xunta Xeneral venceya esti pasu col alcuerdu cola FSA-PSOE pa l’apoyu de la coalición a Javier Fernández pa la so investidura como presidente del país, nel que la oficialidá del idioma quedó otra vuelta pa prau. Sicasí, ésti sí que recoyía trés puntos en materia llingüística, ente’l que s’incluyía reforzar el nivel institucional de la llingua asturiana. Al respeuto, IX demandaba una viceconseyería de Política Llingüística qu’al final va quedar nesti pequeñu avance.

“A última hora, una potenciación del asturianu, onde pa nós ye más importante'l güevu que'l fueru. Esto ye, ye más importante'l conteníu de la direición xeneral y de la so dependencia directa del conseyeru –antes dependía de la viceconseyería de Cultura– que la denominación final d'esa función, que nós deseyábamos viceconseyería pero qu'a la fin l'alcuerdu ye de Direición Xeneral de Planificación Llingüística y Normalización”, esplicó Llamazares.

Padilla, l’escoyíu

La persona, a falta de confirmación oficial, que va tar al frente de la direición xeneral nueva ye Fernando Padilla Palicio, direutor del Colexu Públicu Escueles Blanques (Uviéu) y persona sensible cola llingua asturiana. Diplomáu en Maxisteriu y Llicenciáu en Pedagoxía pola Universidá d’Uviéu, yá collaborara cola conseyería n’asuntos rellacionaos col idioma, llegando a ocupar el puestu de coordinador de la enseñanza de Llingua Asturiana.