La poesía toma Mieres y Samartín del Rei Aurelio

Fame Poétika entama un eventu na cuenca'l Caudal, nel qu'Iniciativa pol Asturianu pon un puestu informativu, mientres que'l CSA La Semiente celebra la so V Gran Timba Poétika.

La llibrería-café La Llocura (Ayer, 1) ye'l llugar escoyíu pol coleutivu Fame Poétika pa celebrar el so segundu alcuentru poéticu en Mieres nos sos cuatro años de funcionamientu. Foi l'añu pasáu cuando presentaren el poemariu 'Seguimos con fame' na Casa Cultura Teodoro Cuesta.

La banda de versiones rock El Hombre de las Estrellas va encargase d'abrir les actividaes a les 19 hores, pa siguir darréu cola propia timba poétika, coordinada por Diego Solís. Nella pueden participar toles persones que lo deseen, valorando la llectura de testos propios, amás de músicos o artistes que quieran averase a esti puntu d'alcuentru artísticu en direuto.

Pa ello han de contautar con Fame Poétika al traviés de les sos plataformes o redes sociales, o acudir un poco enantes de la hora de comienzu del eventu a La Llocura. Na llibrería-café tamién va tar presente Iniciativa pol Asturianu, que va poner un puestu nel que van poder mercase llibros y revistes, amás de servir d’información sobre la situación del idioma y cómo esta organización trabaya pola so dignificación.

En L'Entregu

Na otra cuenca, el Centru Social Autoxestionáu La Semiente, coincidiendo cola celebración del Día Mundial de la Poesía (21 de marzu), tien preparao una sesión doble sobre esti xéneru lliterariu. En primer llugar, a les 20 hores, va presentase'l llibru 'Degeneración salvaje', antoloxía poética coordinada por Alberto Claver y que recueye testos de Pablo Benavente, Escandar Algeet, David González, Pablo X Suárez, Laura Marcos, Laura Fjäder, Lucía Moreno, José Yebra, Víctor Cuetos, Gema Fernández, David Suárez Suarón, Kiko Martínez Quintana, Annamária Ardelean y el propiu Claver, cola presencia confirmada de Yebra, Cuetos, Suárez Suarón, Fernández y Pablo X Suarez.

Darréu va comenzar la V Gran Timba Poétika, onde poetes van dir esbillando les so creaciones con o ensin acompañamientu musical. El micro, como ye vezu, va tar abiertu pa que cualquier persona esprese la poesía que lleva dientro.