La plaza de toros d’Uviéu en trámite pa ser Bien d’Interés Cultural

El Boletín Oficial del Principáu d'Asturies del xueves pasáu dio anuncia del entamu del plazu d'alegaciones al espediente de declaración como Bien d'Interés Cultural de la Plaza de Toros d'Uviéu

El procesu de declaración como BIC de la plaza de toros uvieina lleva yá más de venti años allancáu, en cuantes que l'apertura del memu vien yá de 1982. Agora, la Conseyería de Cultura apauta un plazu de 20 díes pa presentar alegaciones a la declaración de "BIC con la categoría de monumentu" una categoría na qu'entren les escultures colosales, edificios, obres o estructures arquitectóniques d'inxeniería d'interés singular".

Anque va yá 23 años qu'entamó'l procesu pa que fuere BIC, que ye'l másimu reconocimientu llegal a un monumentu, conxuntu o yacimientu arqueolóxicu que cabe na llei, la plaza de Buenavista ye yá un elementu de másima protección al tener "protección de calter integral" nel Inventariu d'Edificios y Elementos d'Interés del Conceyu, una protección mui criticada dende colectivos antitaurinos y ecoloxistes como ANA, qu'entovía l'añu pasáu con motivu de l'apaición del Plan nuevu d'Ordenación Urbana d'Uviéu declaraba nes sos alegaciones que nun s'entendía tanta protección pa la plaza cuando elementos patrimoniales y espacios verdes de la ciudá como El Campillín apaecíen con "protección parcial", y el mesmu Campu San Francisco, paséu burgués y xardín históricu de la ciudá tenía "nivel de protección ensin especificar".

Dende'l puntu de vista arquitectónicu la plaza uviéina ye una de les más interveníes y remocicaes d'España. Anque l'edificiu orixinal yera de 1899, la plaza quedó cásique destruyida na Guerra Civil. L'ayuntamientu mercóla nel 1944 y nel 1957 acabáronse les obres de lo que ye l'edificiu actual, que tien estructura d'hormigón.