La Plataforma pola Defensa de Redes acusa a la Procuradora Xeneral de siguir instrucciones del gobiernu

La Plataforma pola Defensa del Parque Natural de Redes acusó a la Procuradora Xeneral d'Asturies, María Antonia Fernández Felgueroso, de nun tener "independencia funcional o política del Gobiernu asturianu" dempués de la rempuesta que-y dio esti cargu a la plataforma, que presentare una quexa formal pola actuación policial n'acampada de protesta que se ficiere l'añu pasáu contra la construcción del banzáu de Caliao



Los miembros de la plataforma acamparen en Caliao (Casu) en setiembre del 2006 como protesta énte'l proyectu de construcción del embalse que ta previsto facer nel Ríu Nalón. La Dirección Xeneral de Recursos Naturales retrucó a l'acampada alvirtiendo que suponía "un usu non permitíu nel parque", produciéndose identificaciones a los acampaos y controles policiales a tolos coches que s'allegaben al llugar de l'acampada por parte de les fuerces de seguridá. La plataforma presentó por ello una quexa énte la Procuradora Xeneral pidiéndo-y qu'investigare l'actuación de la Dirección de Recursos Naturales y de la Delegación del Gobiernu n'Asturies, partiendo de la base de que se violaren "derechos fundamentales" de circulación, reunión, espresión, privacidá y participación n'asuntos públicos.

La rempuesta de la procuradora esplicaba que Recursos Naturales nun cometió infracción nenguna en cuantes que nun hebo solicitú formal pa facer el campamentu, mientres que, no tocante a l'actuación policial, Felgueroso esplicó que nun podía pronunciase por ser dalgo que "escede l'ámbitu de competencies d'esta institución".

La Plataforma llamentó la rempuesta de Felgueroso, anque dende'l colectivu anti - embalse aseguren que "podía esperase", teniendo en cuenta que María Antonia Felgueroso fuera hasta va poco "una conceyala n'activu, ex altu cargu y militante del partíu en Gobiernu"