La plataforma pola defensa de la térmica d'Avilés apela al Defensor del Pueblu

La Plataforma Cívica "Salvemos la Térmica" unvió esti vienres un escritu con calter d'urxencia a Fernando Múgica, Defensor del Pueblu en que-y pide que mande aparar de manera cautelar les intervenciones de desmantelamientu y derribu na central, argumentando que, casu de non facelo "supondría una perda irreversible pal patrimoniu".

L'escritu espón con documentos la historia y valor patromonial de l'antigua central térmica de los años 50 y rescampla la contradicción de los cargos políticos y autoridaes del conceyu y del Gobiernu asturianu, que taben nel añu 2003 d'alcuerdu na conservación de la térmica y que contaben incluso cola cesión del edificiu por parte de la sociedá Infoinvest. Trés años dempués la térmica ta oficialmente descatalogada y a piques d'entamase nella un procesu de derribu que la plataforma albidra que se debe a delles circunstancies que s'amestaron, casu de la fracasada planta enerxética de ciclu combináu de la Empresa Isolux, y dempués de que la Conseyería de Cultura llegare a encargar y abonare un proyectu de "Plan director del Centru Integral pa la Cultura y l'Ociu" pa la Central Térmica.

Amás de la paralización de les obres, la plataforma píde-y al Defensor del Pueblu qu'investigue supuestes irregularidaes o desvaríos na xestión y tramitación del derribu, al tar la térmica catalogada oficialmente hasta mayu del 2006.