La Plataforma Cultural de Corvera denuncia un amagüestu institucional pa la destrucción de los horros de Truyés

La Plataforma Cultural de Corvera emitió un comunicáu denunciando que la empresa constructora Dolabay-Erma, que ta llevando alantre una urbanización de xalés nel llugar de Truyés tien previsto valtar los horros, paneres y restos del conxuntu etnográficu del pueblu que resistieron hasta agora y sobre los qu'esistía un índiz de protección patrimonial que torgaba la so destrucción. La plataforma cultural diz que tien conocimientu de que'l Conceyu de Corvera solicitó un espediente de ruina sobre estos restos etnográficos.


El conxuntu sobre'l que pesa l'amenaza de declaración de ruina ígüenlu dos paneres y dos horros apegaos al traviés d'un corredor. La plataforma asegura qu'estes construcciones inda tan en bona condición y que namás precisen de llabores menores de remocique pa ser a caltenese. Dende la plataforma cívica aseguren tener conocimientu al traviés de "filtraciones" de la Conseyería de Cultura de que l'espediente de Truyés retiróse de les manes del responsable que nel so día emitiere opinión contraria al derribu pa pasá-ylu a otra instancia desconocida que creen que tien intención d'autorizar el derribu, y albidra que tres d'ello hai un "complot" nel que taríen empresa, Conceyu y Conseyería de Cultura, pa desaniciar estes construcciones, de les que namás se respetaría una, y ello treslladándola al llugar que-y abultare afayadizu a la promotora. La Plataforma corverana llamenta fondamente que "sobre un terrén espropiáu pola fuerza a 17 euros el metru, nun vaya gastase un duru en restaurar y conservar nel so llugar unos bienes culturales únicos que-yos pertenecen a tolos asturianos".