La plataforma corverana “La Foz del Pielgu” denuncia estrozos nos horros de Truyés

La plataforma vecinal y cultural "La Foz del Pielgu" qu'axunta a los vecinos de la corverana parroquia de Truyés, presentaron esta selmana un escritu en rexistru de la casa conceyu pidiéndo-y al alcalde qu'obligue a la constructora Dolabay Erma, responsable de les obres d'urbanización d'una colonia de xalés que ta faciéndose nel llugar, a reparar los horros y paneres de Truyés que, al dicir de la plataforma, tan esfarraplando por culpa de les obres.

Nel so escritu los vecinos de Truyés sorrayen el calter d'elementos protexíos pola llexislación en materia de patrimoniu de los horros de Truyés y denuncien que tan produciéndose daños nos mesmos. Estos daños, qu'afecten a los corredores y a los teyaos de los horros, sedríen según la plataforma responsabilidá dafechu de la empresa constructora.

El proyectu d'urbanización de Truyés ígüenlu 600 viviendes y un campu de golf a construyir sobre una superficie espropiada de cerca de 1 millón de metros cuadraos. L'agresiva actuación urbanística lleva topando dende l'entamu cola resistencia d'esta plataforma cívica que, anque nun consiguió como yera'l so oxetivu que la Conseyería de Cultura refugare la máxima catalogación patrimonial pa Truyés, si que-y arrancó al órganu de gobiernu una declaración en marzu d'esti añu na que se reconocía la esistencia de "elementos etnográficos a caltener" en Truyés en referencia al conxuntu d'horros y paneres oxetu de la denuncia que se presentó agora énte'l Conceyu.