La plataforma contra’l derribu de la térmica d’Ensidera recurre a los tribunales

La plataforma cívica "Salvemos la Térmica" que s'opón al derribu de l'antigua central térmica d'Ensidesa-Avilés, monumentu de la industrialización asturiana de la década de 1950 dio anuncia de la presentación na sala dos del Xulgáu de lo Contencioso d'Uviéu d'un recursu "contenciosu alministrativu contra la llicencia apurrida pol Conceyu d'Avilés" pa llevar alantre los trabayos de demolición de la instalación, a la que la plataforma quier que se-y dea un nuevu usu cultural.

Les organizaciones polítiques, de vecinos y ecoloxistes que formen la plataforma xunto con dellos sindicatos esixen que se paralicen nel intre los llabores de demolición que ta faciendo la empresa Infoinvest y que s'investigue la llegalidá del procedimientu de decretu paesta llicencia, qu'aseguren que "carez de los informes ambientales preceptivos por ser un espaciu con suelos contaminaos como reconocen el Principáu y la entidá propietaria". La Plataforma quier que, casu de nun poder torgase'l derribu, que ta nuna fase mui avanzada, polo menos "se sancione a los responsables de les illegalidaes alministratives si les hubiere".

Les últimes novedaes sobre la situación d'esti monumentu industrial asturianu coinciden nel tiempu cola anuncia que llega dende la otra parte del cordal, onde van celebrase unes xornaes sobre patrimoniu industrial centraes n'antigua central térmica de Compostilla, na que les alministraciones lleoneses tienen comprometida la creación d'un muséu de la enerxía.