La planta de Tenneco en Xixón asegura actividá pa dos años

|

Los trabayadores de Monroe ganen la so llucha: Tenneco nun se pieslla. El comisariu d’Industria y Emprendimientu y vicepresidente de la Comisión Europea, Antonio Tajani, anunció la decisión de la empresa de caltener l'actividá.

Tajani aconceyó ayeri en Roma col direutor executivu de la multinacional, Gregg Sherrill; el xefe d’operaciones, Hari Nair; y el conseyeru xeneral, James Harrington, pa falar sobre les alternatives pa evitar el zarru de la planta de Xixón, afeutada por un ERE –anuláu pola xusticia– que pretendía dexar na cai a 216 persones. Nesti alcuentru, los responsables de Tenneco amosaron la so conformidá na continuidá de la planta, anque con una baxada de l’actividá. Pa ello, proponen que dalgunos trabayadores opten pola xubilación anticipada y qu’otros acepten el treslláu a otres plantes. Asina, la planta de Xixón tendría asegurada producción pa los dos años próximos, plazu nel que la multinacional espera vender la propiedá a otra empresa.

“Nun momentu nel que la industria ta tornando otra vegada a ser el centru de l’actividá económica n’Europa, hemos d’evitar per tolos medios el zarru d’empreses y la perda de trabayos. Y por tanto, agradezo a Tenneco por esta propuesta que permite evitar el zarru de la factoría de Xixón y la continuidá del negociu. Entiendo qu’esta vía necesita aldericase con detalle colos representantes de los trabayadores y les autoridaes, pero pa min ta nidio que ye un pasu significativu na direición correuta. El mio equipu va contautar coles partes nos díes próximos pa intentar finar con esti problema baxo la base de los principios enantes espuestos”, resaltó güei Tajani nuna nota. Esti avance na situación de la Monroe vien tres los dos xuicios ganaos –al qu’hai que sumar un recursu puestu pola empresa– polos trabayadores qu’anulaben l’ERE presentáu por Tenneco y qu’obligaba a realmitir a tolos emplegaos.

Precisamente, la plantiya de la planta xixonesa de la multinacional estauxunidense va poder celebrar esti ésitu’l xueves nel homenaxe que va recibir na inauguración del V Primer Sidre l’Añu, acontencimientu sidreru que tien llugar nel Muséu del Pueblu d’Asturies. 

 

Contador Estadistiques