La pita de la Xunta actuó ayeri en Siero

El Presidente asturianu Vicente Álvarez Areces acudió ayeri a Siero, conceyu onde presentó y inauguró dellos proyectos por importe de más de 70 millones d'euros. L'enllace de l'autovía minera y l'autovía A-64 foi el protagonista d'una xornada a la que tamién asistieron la Conseyera de la Presidencia, Mª José Ramos, el Conseyeru de
Mediu Ambiente, Ordenación del Territoriu y Infraestructures, Francisco
González Buendía y dellos directores xenerales.

Nel actu aprució la pita de la Xunta Pola Defensa de la Llingua Asturiana, la famosa criatura emplumada qu'acompaña munches vegaes a los cargos públicos d'Asturies en reivindicación de la oficialidá del asturianu y que llevaba un tiempu ensin dexase ver n'actos públicos. Ello nun quitó pa que l'animal mariellu volviere a tener problemes cola llei como n'otres ocasiones, procediendo los axentes del cuerpu de policía qu'acompañaben a la comitiva institucional a retener a la pita y el so cortexu pa proceder a la identificación de los manifestantes pacíficos a favor del asturianu.


La reaparición de la pita tien llugar pocos díes enantes de la convocatoria, pa esti sábadu n'Uviéu, d'una manifestación en defensa del asturianu nel sistema educativu con motivu del debate alredor del curriculum de primaria, que na so redacción orixinal daña l'asignatura d'asturianu al rebaxar a efectos prácticos el so estatus. La mesma Xunta Pola Defensa de la Llingua Asturiana ye una de les entidaes qu'organicen la marcha xunto colos sindicatos d'enseñanza SUATEA, CCOO y FETE - UXT. La salida de la manifestación va ser a la 1 del mediudía na estación de la RENFE de la capital asturiana.