La pintura del músicu en Samiguel de Lliño protagoniza la conferencia d'Ástura

Va ponela Lorenzo Arias, profesor titular d'Historia del Arte na Universidá d'Uviéu.

'La pintura mural del músicu de Samiguel de Lliño' ye'l títulu de la conferencia de payares de cultura asturiana qu'entama Ástura nel llar social del Atenéu Obreru de Xixón. "Mui especializada, va tratar de l'ayalga artística del músicu de Samiguel de Lliño, qu'apaeció tocando un cordófonu, fechu aislláu d'importancia estremada na iconografía eclesiástica del sieglu IX y venceyáu al ciclu iconográficu de Beatu de Llébana, gran defensor de la 'Asturiensi ecclesia' frente al adopcionismu de Toledo. ¿Innovación artística? ¿Dixebra de les normes? Con seguridá esistiríen representaciones pictóriques figuratives muncho más estendíes nésta y otres ilesies. ¿Qué podemos deprender d'ello? Les respuestes tienles ún de los grandes especialistes del arte, la metroloxía y la pintura mural altomedieval: el profesor Lorenzo Arias Páramo", apunten dende l'asociación.

L'espertu tien asoleyaes decenes de espublizaciones científiques sobre los temes de la so competencia, amás de ser autor y coordinador de la 'Enciclopedia del Prerrománico en Asturias', 2 tomos editaos pola Fundación Santa María la Real d’Aguilar de Campoo nel 2007, y ye miembru de numberoses comisiones científiques, asina como miembru de númberu permanente del Real Instituto de Estudos Asturianos (RIDEA), miembru correspondiente del Institutu Arqueolóxicu Alemán y patronu d’honor de la Fundación Valdés Salas. La charra va tener llugar esta tarde a les 19 hores na sede del Atenéu na segunda planta de la Escuela de Comerciu Antigua, con entrada llibre.