La parroquia cabraliega de Po, primera na que se fai un cribáu comunitariu

La Conseyería de Salú decidió entamar un cribáu comunitario en Po tres la detección d’un casu positivu de COVID-19 nel llugar y ser la so población vulnerable al coronavirus. Les pruebes PCR van facense a lo llargo de la tarde del xueves y de la mañana del vienres a les más de 200 persones censaes nesta parroquia cabraliega.

El Servicio de Salú del Principáu d’Asturies (SESPA) va poner un puestu nel pueblu pa la toma de muestres. Dende la xerencia de l’área sanitaria VI va citase a la población censada pa qu’acuda a facese la prueba ente esta tarde y mañana pela mañana.

Salú respuende con esti cribáu comunitariu a un positivu detectáu recién en Po, llugar carauterizáu pola edá alta de los sos habitantes, lo que los convierte nun grupu de riesgu énte la COVID-19. Ye la primer vegada que se da esti pasu n’Asturies.

23 positivos ayer

Los datos del COVID-19 dexaron 23 positivos ayeri, 8 menos que’l martes, cuando se detectaron 31. D’ellos 7 son contautos estrechos de persones afeutaes pola COVID-19 y 3 son importaos, mentes que’l Serviciu de Vixilancia Epidemiolóxica ta estudiando’l restu de contaxos.

Anguaño hai 2 persones ingresaes na UCI y 7 en planta, una menos que’l martes. El númberu de pacientes con alta epidemiolóxica ye 2.125.

Semeya obra de Manuel Bratumpin baxo llicencia CC BY-SA 4.0.