La pancarta de "Conceyos pola Oficialidá" al Plenu del Conceyu d'Avilés

"L'Ayuntamientu d'Avilés nun ye partidariu de la oficialidá, por tanto nun va a participar n'esa campaña", rempuesta del conceyal Huerga (PSOE)

Nel plenu de güei xueves del Conceyu d'Avilés los Grupos Municipales de Somos Avilés, Izquierda Xunida y Ganemos pidieron a la alcaldesa que respuenda a la petición d'asitiar na fachada de la la Casa de Conceyu de la pancarta de "Conceyos pola Oficialidá" con testu "OFICIALIDÁ pa que nun muerra la nuesa llingua".

Por parte del equipu de gobiernu contestó'l conceyal d'urbanismu y planificación Luis Ramón Fernández Huerga diciendo  que  ta respetándose y promocionando l'asturianu según l'actual llei de promoción y usu pero que l'Ayuntamientu d'Avilés, y el so partíu, nun ye partidariu de la oficialidá, y por tanto nun va a participar n'esa campaña.

El día 6 de mayu, Día de les Lletres Asturianes, conceyales de Somos Avilés asitiaron la pancarta  sobre la fachada de la Casa Conceyu. L'alcaldesa mandó retirar la pancarta porque, entre otros motivos, nun se pidió permisu. Con fecha  de 24 de mayu los Grupos Municipales de Somos Avilés, Izquierda Xunida y Ganemos rexistraron una solicitú na que pidíen que l’Ayuntamientu d’Avilés s’axuntare a la campaña «Conceyos pola Oficialidá», entamada pola organización cívica Xunta pola Defensa de la Llingua Asturiana en collaboración col Conceyu de Bimenes. Al nun tener rempuesta por parte de l'alcaldía, llevaron a plenu la solicitú pa que na sesión plenaria se manifieste y diese contestación a la petición.

Axuntamos la pregunta fecha y la contestación final del conceyal Huerga.