La OTAN diz que los neños viven más seguros en Kabul qu'en Londres

El máximu representante civil de la OTAN n'Afganistán, Mark Sedwill, afirmó que posiblemente los neños vivan más seguros na capital d'Afganistán, Kabul, qu'en ciudaes como Londres, Nueva York o Glasgow.

Nuna entrevista que va emitir esti llunes el programa infantil 'Newsround', de la canal de televisión británica Children's BBC (CBBC), Sedwill dixo que "en Kabul y n'otres grandes ciudaes hai pocos atentaos con bomba" y que por ello pue que los neños tean "más seguros" ellí "qu'en Londres, Nueva York, Glasgow o munches otres ciudaes".
 
"Ye una sociedá mui dirixida hacia la familia, asina que ye como una especie de ciudá formada por un conxuntu d'aldees", esplicó. Pero les declaraciones de Sedwill yá recibieron crítiques y contradícense colos testimonios de dellos menores a los que s'entrevistó nel programa.
  
Sohrad, un estudiante de 16 años de Kabul, afirmó en 'Newsround': "Como se producen esplosiones na ciudá, ye espantible dir a la escuela. Tenemos mieu qu'haya esplosiones nel colexu".
  
Manija, d'once años y tamién de Kabul, contó cómo ye vivir nun país en guerra. "Cuando hai esplosiones póngome triste porque la xente muerre, pero al otru día, cuando tien una vida normal y celebrar, póngome contenta".

Más de mil neños muertos
El director executivu de la organización Save the Childrem, Justin Forsyth, reprochó a Sedwill el comparar la situación de los neños afganos cola de los que viven en ciudaes de países occidentales. "Afganistán ye'l peor llugar del mundu onde puede nacese. Ellí, ún de cada cuatro neños muerre antes de cumplir los cinco años", señaló.
  
"Tendríamos qu'escuchar lo que dicen los neños n'Afganistán. L'añu pasáu foi l'añu en que morrieron más neños dende'l 2001; por mor del conflictu morrieron más de mil", recordó. Pero Forsyth dixo que nun se trata "namás de les bombes", dao que "cada día muerren 850 neños, principalmente por enfermedaes que puen prevenise fácilmente, como diarrea o neumonía, o por malnutrición".
  
Asina, señaló que "la vida de los neños n'Afganistán cuerre un gran peligru" y por eso "la comunidá internacional tien que dedicar tanto tiempu, esfuerzu y dineru a les operaciones de seguridá como a torgar que los neños muerran innecesariamente".
  
Kabul sufrió lo peor del conflictu afganu y anque últimamente la seguridá meyoró na ciudá, sigue considerándose que ye un llugar  peligrosu pa vivir. Dende agostu del 2009 lleváronse a cabu na capital 'con éxitu' catorce atentaos suicides y otros cinco quedaron esbarataos.
  
Un voceru del Conceyu de Glasgow citáu pola cadena BBC dixo qu'entiende que seya importante calmar a los neños afganos al respecto de la so seguridá, pero añadió qu'esta vez Sedwill "equivocóse".
  
"Lo que va algamar con esta comparanza ye que la xente de Glasgow, Londres y Nueva York saque les estadístiques pa demostrar lo equivocao que ta, y l'importante mensaxe que quier dirixir a los afganos va perdese", aseguró.

Hasta 2014
Per otru llau, el máximu representante civil de la OTAN n'Afganistán contestó a la entruga de por qué les fuerces internacionales nun ganaron tovía a los talibán afirmando qu'esti conflictu "nun ye como la Segunda Guerra Mundial o como otres guerres que la xente conoz, nes que se llucha nel campu de batalla".
  
"Como los talibán nun puen lluchar d'esa manera (...), lo que faen ye que s'escuenden ente la xente. Nun vamos colar nos d'Afganistán. Nun vamos dir nos de Kabul hasta que teamos totalmente seguros de que los talibán nun van poder tornar", sorrayó.
  
Nel conceyu celebráu hai unos díes en Lisboa, los Estaos miembros de l'Alianza Atlántica apoyaron una estratexa col oxetivu de qu'a finales del 2014 les fuerces de seguridá afganes asuman la responsabilidá de combatir a los talibán.