La organización de les xornaes “Fermín Penzol” llamenta l’ausencia de Xeira y la Xunta

La organización de la "Escuela Fermín Penzol" , que va analizar esti fin de selmana la situación llingüística d'Asturies y Galicia en Ribadeo, culpó a la Academia de la Llingua Asturiana de boicotear la escuela nel actu de presentación de les xornaes.


La conceyala de Cultura de Ribadeo, Mariluz Álvarez (BNG), y el técnicu de normalización llingüística del conceyu, Xavier Campos participaron na rueda de prensa na que llamentaron l'ausencia de los colectivos asturianos Xeira y Xunta Pola Defensa de la Llingua. La organización dixo "respetar esta decisión" y interpretó qu'esta negativa a participar nel foru de debate de Ribadeo ye "reveladora de "l'absoluta dependencia destos colectivos a les directrices que-yos dá L'Academia de la Llingua." A la qu'acusen de "decretar un boicot a tolo que sía entendimientu y collaboración y a tolo que sía reconocimientu de la variedá llingüística propia de la comarca eonaviega, el gallegu d'Asturies" un boicot que, al paecer de los organizadores de la Escuela Fermín Penzol, espúrrese "a too aquello que l'ALLA nun controla y que nun tien fidelizao al traviés de subvenciones, beques y ayudes económiques".


El ciclu preséntase como un foru cultural en defensa del gallegu y del asturianu "pa facer de la llingua un llugar d'alcuentru y acabar col campu de batalla nel qu'algunos ayenos a la zona quieren convertila". La dirección de la Escuela acusa nesti sentíu "al PP de la zona, que politizó la cuestión pa emplegala como arma contra'l PSOE, faciendo casu de grupos radicales, ayenos a la comarca eonaviega y a minoritarios como Andecha Astur". Pa la dirección de la escuela l'actitú del Presidente del Principáu Álvarez Areces "que siempre fala de la necesidá de collaboración ente galegos e asturianos" ye muncho más correcha, ello al empar que s'apunta que "La escuela Fermín Penzol desea la cooficialidá del asturianu y defende la diversidá llingüística y cultural como una riqueza" La organización de la Escuela atalanta Asturies como "una comunidá trillingüe, con una sola llingua oficial -el castellanu- y con dos propies -el gallegu na parte occidental y el asturianu nel restu del so territoriu- que nun l son, correspondiéndo-y les competencies sobre les mesmes nesti sentíu a l'alministración asturiana".

La organización congráciase de la presencia nes xornaes de "El meyor escritor en llingua asturiana" en referencia a la persona de Xuan Bello y de los responsables de política llingüística d'Asturies, llamentando que "quien s'autoescluye y boicotea un foru como esti nun-y fai bien nengún a les llingües d'Asturies y fomenta un maniqueismu y confrontación absurdes y inesistentes" rematando que "ye gana de crear problemes onde nunca los hebo nin los va haber".