La organización Darréu presenta la revista “Írguite”

La organización de mocedá Darréu, venceyada al partíu políticu nacionalista Andecha Astur presentó esta selmana un voceru que va distribuyise de baldre en locales sociales, tiendes, chigres, biblioteques y actos públicos y que la organización cuenta con colgar tamién de la so páxina web. 1.000 exemplares ye la tirada d'esti cartafueyu que se plantega l'oxetivu d'esparder información "de l'actividá y los posicionamientos políticos de la izquierda nacionaliega, col enfotu de crear concencia nacional y concencia de clase ente la mocedá asturiana". Los conteníos d'esti primer númberu, que tien 10 páxines ufierten un repás de l'actualidá asturiana de los últimos meses, una presentación de Darréu con un resume de les sos actividaes, una entrevista col responsable de la Estaya d'Internacional de la organización moza andaluza "Jaleo" y un artículu sobre'l Día la Muyer Trabayadora, amás d'una sección que, baxo'l nome de "Mecigayu" apurre información variao de cultura asturiana y actualidá de música, llibros y internet.