La OPV de Probitas Pharma quedó pa prau

La ufierta pública d'esti veranu nel parqué madrilanu tornó en desconciertu cola so suspensión. Según fontes de Probitas Pharma les duldes sobre la estabilidá del mercáu y les dificultaes pa cubrir el tramu institucional reserváu a los fondos d'inversión norteamericanos foron les razones qu'emburriaron a los xestores de la OPV a suspendela "sine die". Esta nun ye la primer vegada qu'una compañía camuda los planes nel últimu momentu, ya qu'empreses como Renta4, Ono o Meta4 suspendieron les sos OPV dempués d'unes intenses campañes publicitaries.

El restu de la selmana foi a la baxa con un Ibex perbaxo los 8.000 puntos y unos mercaos internacionales mui pendientes del actualidá xeopolítico y los datos macroeconómicos de los Estaos Uníos.

Les estadístiques de la selmana centráronse al otru llau del Atlánticu. Asina los datos más señeros nos Estaos Uníos foron: l'IPC de xunu que medró un 0,3% -una décima más de lo esperao- IPC interanual que tamién medró penriba previsiones hasta'l 3,3%, y datu de confianza de xunetu de la Universidá de Michigan qu'algamó los 96 puntos pero menos de lo qu'apuntaben los analistes. Na Zona Euru l'IPC nun camudó nel mes de xunu.

Les duldes de la comunidá inversora tan poniendo munches torgues a la recuperación de los mercaos. La selmana pasada les cayíes nes bolses tuvieron marcaes pola falta de liquidez y el pequeñu marxe en que tan moviéndose les cotizaciones. El mieu de los inversores al nuevu ciclu de xubes nos tipos d'interés xunta'l periodu de veranu tan poniendo baxo mínimos el volume de negociu de les bolses. Nes bolses de Nueva York sintiéronse estes duldes y les cayíes foron xeneralizaes. Asina l'índiz Dow Jones mangóse nos 10.139,78 puntos con unes perdes del 0,23% mentanto que'l tecnolóxicu Nasdaq tuvo perdes del 1,55% pa finar nos 1.883,15 puntos.

Nel Vieyu Continente tampoco nun pintó meyor y les bolses pesllaron en negativo. Solo los valores rellacionaos col petroleu acutaron sitiu na parte alta de los índices.

L'Ibex-35 tuvo un pieslle probe nos 8.010,90 puntos, baxando dacuando de la cota sicolóxica de los 8.000. El volume de negociu sigue mui baxu, na raya de los 2.700 millones d'euros. El casu ye que la Bolsa de Madrid lleva dende mayu con esti movimientu ente los 7.900 y 8.100 puntos. Ente les xubes destacó Ferrovial xunta ACS y FCC. Nel terrén de les perdes el Grupu Telefónica foi'l más castigáu.

Máximu del euru nos últimos cuatro meses algamando una cotización de 1,2460 dólares unidá. Esta ya ye la quinta selmana de xubes d'un euru con mui bona traza y en xuba llibre. Mentanto'l dólar nun sólo s'asitia en perdes respective a la divisa europea sinón que tamién ta perdiendo fuerza respective al yen xaponés o'l francu suizu.

Nel mercáu de renta fixo los bonos tuvieron una selmana a la baxa finando'l bonu referencia l'alemán a diez años con una rentabilidá del 4,18%.

El petróleu nun acaba d'aposentar y entama unes xubes pequeñes pero que son abondo pa tirar p'abaxo unes bolses en vacaciones. Asina, l'oru prieto remató la selmana pasada con una xuba algamando una cotización del barril Brent penriba los 38 dólares.

La inestabilidá d'Iraq ye la razón más señera d'estes xubes. Otramiente'l metal amariello ta beneficiándose de la cayida del dólar y ya s'asitia na cota de los 400 dólares la onza d'oru. El valor del oru ye onde s'atechen agora munchos énte la inestabilidá y volatilidá del mercáu de divises.