La OLP pide a EE.UU un mapa coles les fronteres finales

|

La Organización pa la Lliberación de Palestina (OLP) quier qu'Estaos Uníos presente un mapa en que se muestre ónde considera Israel que tienen que tar les sos fronteres finales y quede claro si estes inclúin cases y territorios palestinos.

Estes declaraciones pertenecen a ún de los sos dirixentes, Yasir Abed Rabbo, y produxéronse dempués del pidimientu de Washington de que los palestinos presenten les sos propies idees en respuesta a la propuesta israelina de que reconozan a Israel como Estáu xudíu en cuenta de que se caltenga la moratoria na construcción nos asentamientos.
  
"Lo que fai falta de l'Alministración estaounidense y Israel ye que mos presenten un mapa del Estáu d'Israel que quieren que reconozamos", señaló Abed Rabbo a Reuters. "¿Ye'l mapa coles fronteres de 1967 o inclúi territorios y cases palestines nes que vivimos?", preguntóse, en referencia al añu nel qu'Israel ocupó Cixordania y la Franxa de Gaza.
  
La reclamación d'Abed Rabbo fai ecu del pidimientu del presidente palestín, Mahmud Abbas, de términos claros de referencia pa les conversaciones de paz. El predecesor de Benjamin Netanyahu como primer ministru, Ehud Olmert, dixo que mostró a Abbas un mapa nel qu'ofrecía ente'l 93,5 y el 93,7 por cientu de Cixordania, cola diferencia debida a la propuesta d'intercambiu del 5,8 por cientu de los territorios, y un corredor que dexare'l pasu seguru ente esti territoriu y la Franxa de Gaza.
  
Pero los palestinos temen que Netanyahu, que nun espresó públicamente'l so respaldu a la postura d'Olmert, nun tener cuenta de permitir l'establecimientu d'un estáu vidable en Cixordania y Gaza, con Xerusalén Esti como capital.
  
Caltener los asentamientos

Israel dixo que pretenden caltener los grandes bloques d'asentamientos en cualquier futuru acuerdu, aduciendo motivos de seguridá, y Netanyahu pidió la permanencia de los soldaos israelinos a lo llargo del ríu Xordán, que probablemente va ser la frontera este del Estáu palestín.
 
 "Nós tamos dispuestos a reconocer, una vez más, l'Estáu d'Israel si Washington mos da un mapa de les fronteres d'esi estáu pa que sepamos si inclúi los nuesos territorios y cases en Cixordania, la Franxa de Gaza y Xerusalén Esti", calcó Abed Rabbo.
  
La OLP reconoció l'Estáu d'Israel en 1993 al entamu del procesu de paz. Coles mesmes, Israel reconoció a la OLP como'l representante del pueblu palestín.
 

Contador Estadistiques