La Oficina Municipal de la Llingua de Xixón organiza esti xueves los I Alcuentros de Mocedá cola Llingua

La Oficina Municipal de la Llingua, en collaboración con distintos centros de Secundaria de Xixón, col Muséu del Pueblu d'Asturies, el Conseyu de la Mocedá y otres organizaciones culturales, organiza pa esti xueves los I Alcuentros de la Mocedá cola Llingua, una cita empobinada a escolares de llingua asturiana d'E.S.O. y Secundaria que se celebren col oxetivu de facer una reflexón sobre la situación actual de la llingua y afalar iniciatives en rellación a ella.

La xornada va facese nel Muséu del Pueblu d'Asturies, entamando a les 11 y rematando a les 14 hores, y nel so programa inclúyense xuegos tradicionales -rana, llave, aros, zancos etc - la proyección de los curtios "Lo que necesites sélo yo" d'Ángeles Cachón Muñiz y "7337" de Sergio G. Sánchez, y alcuentros col escritor Adolfo Camilo Díaz y el dibuxante y ilustrador Alberto Vázquez. Teatru de cai col grupu "Nun Tris" que dirixe Toño Caamaño y l'actuación musical del grupu "Los Ciquitrinos" completen el programa pa esti día.