La Oficina Municipal de la Llingua de Xixón edita un pallabreru sobre'l deporte del baloncestu

Aleru, tiru llibre o bloquéu son dalgunos de los términos qu’inclúi ‘El pallabreru del baloncestu’, espublización editada pola Oficina de Normalización Llingüística de Xixón. Ed Johnson ye’l prologuista d’esti llibrín destináu a neños y neñes.
 
“‘El pallabreru del baloncestu’ forma parte de la coleición de pallabreros del deporte qu’entamamos hai cuatro años col fútbol y que llueu tuvo continuidá col ciclismu y la natación”, esplica María Xosé Rodríguez López, responsable de la Oficina de Normalización Llingüística de Xixón, que destaca “la importante afición qu’hai a esti deporte na ciudá, con munchos equipos y neños y neñes prauticándolo”. Precisamente a ellos ta dedicada esta espublización, que destaca por incorporar munches imáxenes esplicatives, sobre manera n’apartaos como’l del arbitraxe, col oxetivu de que conozan les señes que faen los colexaos pa señalar unos pasos, un tiempu muertu o un campu atrás.
 
Según esplica Rodríguez López, estes iniciatives venceyaes col deporte son un ésitu entre críos y adultos, que nun dulden en proponer términos nuevos que podíen incluyíse nos pallabreros. Ésti del baloncestu va contar amás con un prologuista d’esceición venceyáu con esti deporte, el primeru que nun tien l’asturianu como llingua materna (enantes foron Enrique Castro ‘Quini’ y Chechu Rubiera). Trátase del estauxunidense Ed Johnson, ex entrenador del recordáu Gijón Baloncesto, equipo que permaneciera 4 temporaes na Lliga ACB y qu’abandonó la competición nel 2009, y persona que trabayó enforma cola base nos 27 años d’estancia que lleva en Xixón. Johnson, que pronto va viaxar cola so familia a Atlanta a buscar un futuru meyor pa les sos dos fíes, xixoneses de nacencia, va tar presente na presentación de ‘El pallabreru del baloncestu’, que va tener llugar el martes, a les 17 hores, nel Colexu Públicu Tremañes, actu nel que tamién va tar Carlos Rubiera, conceyal de Cultura, Educación, Mocedá y Festexos. Tres el mesmu, va celebrase un partíu amistosu ente neñes del Tremañes y d’El Piles que va tar radiáu n’asturianu por Santiago Cubillas.