La Oficina del Retornu pa facilitar la vuelta a emigrantes va abrir n’abril

El Gobiernu avanza nel ‘Plan RetornAs’ pa facilitar y promover el regresu d’emigrantes a Asturies. Esti llunes celebróse la sesión consitutiva del grupu de trabayu pa la so ellaboración y la vicepresidenta Gimena Llamedo anunció que n’abril yá va tar en marcha la Oficina del Retornu, ventana d’información y asesoramientu.

La Rede Asturiana de Desarrollu Rural (Reader), los sindicatos UXT y CC OO, Compromiso Asturias XXI, la Federación Asturiana de Conceyos (FACC), les asociaciones El Prial y d’Emigrantes Retornados de Asturias, la Fundación Edes, la Federación Asturiana de Empresarios (FADE), les cámares de comerciu, los conseyos de comunidaes asturianes y el CGCEE, asina como los puntos de retornu del esterior de Buenos Aires y Mar del Plata, formen parte d’esti grupu de trabayu xunto cola propia Llamedo y la direutora xeneral d’Emigración y Polítiques de Retornu, Olaya Gómez Romano. L’oxetivu ye ellaborar un plan pal retornu d’emigrantes asemeyáu al que Galicia vien poniendo en práutica estos años, con munchu ésitu, “una política que queremos facer de manera dialogada, polo que convidamos a les empreses, a los sindicatos, al ámbitu educativu y al municipalismu a participar d’esta estratexa y a arriquecela coles sos aportaciones y puntos de vista”, esplicó la tamién conseyera de Presidencia, Retu Demográficu, Igualdá y Turismu.

La socialista avanzó que n’abril va abrise una de les midíes principales de dichu plan: la Oficina del Retornu. Ésta va “favorecer, dar información y facilitar el retornu de les persones a Asturies y acompañala nel procesu”, con asesoramientu social, llaboral, económicu y alministrativu, tanto a los que yá tornaren como a los que quieran facelo.

D’igual forma, esplicó que se va poner en marcha n’Arxentina “un proyeutu pilotu con dos puntos d’asesoramientu pal retornu”, en concreto en Buenos Aires y Mar del Plata. El ‘Plan RetornAs’ va axuntar toles polítiques de sofitu y impulsu a la vuelta d’emigrantes, dende les que yá se tán aplicando, como les ayudes económiques, hasta les que se van fomentar agora dende l’Alministración autonómica, como la Oficina del Retornu, amás d’aquelles que s’articulen dende otres entidaes o que se propongan incorporar dende los distintos coleutivos.

Na semeya, un momentu de la constitución esta tarde del grupu de trabayu, con María Antonia Fernández Felgueroso, presidenta del Conseyu de Comunidaes Asturianes; Llamedo; y Gómez Romano, xunto a la cristalera.