La Oficina de Política Llingüística xube’l so presupuestu’l 20% pal 2006

Esta mañana ficiéronse públicos los presupuestos de la Conseyería de Cultura pal añu 2006. Nun añu en que'l presupuestu xeneral de la estaya de gobiernu que dirixe Ana Rosa Migoya va tener una xuba global del +52%, pasando de los 105'46 millones d'euros a los 160'39, la Oficina de Política Llingüística va beneficiase tamién d'una xuba que va asitiar el so presupuestu nos 2.062.014 euros, un 20% más que nel 2005.

A falta de conocese les previsiones oficiales del repartu por estayes y planes d'esti presupuestu, del que pel momentu dende la Oficina namás puen dar anuncia que del so importe global, el departamentu que dirixe Ramón d'Andrés vuelve a tener la mesma xuba presupuestaria porcentual que nel 2005, cuando tamién se-y concedió un 20% más de presupuestu sobre les cuentes del 2004.

Con ello resulta un históricu de presupuestos nel que nel primer añu de funcionamientu del organismu (2004) la oficina encargada de la normalización de la llingua asturiana trabayó con un presupuestu de 1.460.000 euros, mientres que nel 2005 la cifra xubió hasta los 1.740.000 euros, pa pasar nel 2006 la raya de los 2 millones, asitiándose nos mencionaos 2.062.014 euros, sobre 343 millones de les antigües pesetes.