La oficialidá ye motivu de celebración en Bimenes

|
La oficialidá ye motivu de celebración en Bimenes

Esti sábadu Bimenes celebra la XX Fiesta de la Oficialidá cola declaración d'oficialidá otra vuelta nel conceyu casi 20 años depués. Dende'l meudía, cuando va tener llugar el Plenu Municipal que l'apruebe, hai actividaes hasta bien entrada la madrugada.

Una vegada fináu'l Plenu, a les 12.30 hores, l'alcalde Aitor García Corte va facer una declaración institucional acompañaú pol primer edil de Miranda de l Douro, Artur Nunes. Depués va ser el turnu de la intervención de dellos cargos públicos de toda Asturies que vienen sofitando la campaña 'Conceyos pola Oficialidá', pa darréu dar pasu a la Danza de la Oficialidá y a un pasucais protagonizáu pol Ensame de Música Tradicional Los Yerbatos y l'Associaçao Mirandanças.

Dambes formaciones van actuar a les 13.30 hores nel prau del Palaciu del Marqués de Casa Estrada, onde a les 14.30 hores empieza la xira popular y va instalase un Mercáu Yerbatu. Yá de tarde, a les 17 hores, ta prevista la celebración del III Concursu d'Escanciadores, prueba puntuable pal Campeonatu d'Asturies d'Echadores de Sidre. Mientres los mayores disfruten del bon facer de los meyores profesionales del país, la reciella va poder divertise con xuegos tradicionales.

A les 21 hores va celebrase una cena nel prau na que, al igual que cola xinta, pue trayese de casa la comida –non asina la bébora–. Darréu, a les 22 hores, va celebrase 'Bimenes en danza' con Cantaruxare, Los Yerbatos y l'Associaçao Mirandanças, pa finar col conciertu de Tsarigando y Alienda (23.30 hores).

Contador Estadistiques