"La oficialidá va facenos un pueblu más cultu", asegura Argüelles

El coordinador d'IX criticó la demagoxa interesada de Mercedes Fernández y la pasividá del Gobiernu de Javier Fernández.

Les declaraciones de la líder popular sobre l'asturianu provocaron una reaición de Ramón Argüelles, que señaló que "utilizar la demagoxa en política ye mui complicao y nun ye una bona idea. Yo podría decir qu'en Galicia, onde se fala'l gallegu, con mucha honra pa los gallegos y les gallegues, ta gobernando'l PP, un señor que se llama Nuñez Feijóo. Si utilizo la demagoxa diría que'l señor Núñez Feijóo ye un nacionalista y ye Puigdemont, y de xuru que, nesti casu, a la presidenta del PP d'Asturies eso nun-y prestaría".

Tamién criticó la insistencia de Mercedes Fernández en venceyar la cooficialidá del asturianu y del gallego-asturiano cola izquierda, porque "hai muncha xente que nun comparte valores d'izquierdes, sinón que más bien tien idees de derecha, y que defende l'asturianu porque sabe que ye la nuesa cultura, la de los nuesos antepasaos; que ye dalgo a recuperar". D'igual forma, dirixó pallabres pal Gobiernu de Javier Fernández pola so pasividá, al considerar que "debería tener una postura bien definida y bien nidia, con una apuesta sincera pol asturianu", dalgo que "tampoco nun fai".

Darréu posicionóse xunto a los que caltienen "una posición moderada pero propositiva, ensin obligar a naide a que deprenda l'asturianu nin que lu utilice, sinón dar la posibilidá de que nun se pierda y de que voluntariamente la xente lu deprenda", entendiendo que la oficialidá "va facenos más fuertes y va facenos llegar más lloñe. Va facenos un pueblu más cultu, más en condiciones de defender la nuesa identidá".