La oficialidá, presente nel Alderique d'Orientación Política Xeneral

Javier Fernández ratificóse na so posición de cumplir col so programa eleutoral na segunda xornada del Alderique d'Orientación Política Xeneral, na que tuvo pallabra la oposición. La postura del Gobiernu y la FSA sobre la oficialidá foi tema de debate.

El primer turnu de pallabra foi pa la vocera popular, Mercedes Fernández, que nun tardó en tocar el tema depués d’acusar al presidente del país d’entregar Asturies a Podemos a preciu de saldu tomando como referencia’l discursu d’ayeri, nel que’l socialista amosó la so disponibilidá a aceptar propuestes importantes pa la formación morada y Izquierda Xunida  (IX) de cara a sacar alantre los presupuestos del 2018. La presidenta del PP asturianu criticó la postura nueva de la FSA énte una oficialidá que considera que naide quier y que nun se necesita.

Na so réplica, Javier Fernández afirmó que nun va avanzar hacia la cooficialidá nesta llexislatura y aceptó’l posicionamientu que tienen al respeuto los socialistes asturianos tres la votación del congresu últimu: “El Partíu Socialista fadrálo, esplicarálo a los asturianos y presentarálo. Ye dalgo llimpio y tresparente. Enantes nun creyíamos na cooficialidá y agora sí”, apuntó. Tamién criticó a la popular por demonizar un asuntu “que vusté impulsaba”, recordando que nel 1998, xunto con Francisco Álvarez-Cascos, propunxo una reforma del Estatutu qu’incluyese la oficialidá cuando hubiera una mayoría planificada na Xunta Xeneral.

Gaspar Llamazarez, voceru d’IX, demandó, mentes, un mayor compromisu pa col asturianu y la so oficialidá a Javier Fernández, que-y respondió que nun va avanzar “más allá de lo que me marqué nel programa eleutoral”. “Nun me creo pa nada qu’una llingua cooficial, por ser cooficial, esixa imposiciones. Seguramente’l plantegamientu que se va facer nun conlleva nenguna imposición, pero conlleva obligaciones. Instalar una llingua nel senu d’una sociedá conlleva obligaciones pa dalgunos axentes y hai que dicilo, y ye lo que va facer la Federación Socialista Asturiana (FSA). Nun vea perhí nenguna otra cosa más que la llóxica política na qu’habitualmente me muevo”, contestó al diputáu.