La obra del grupu d'artistes ABRA torna a reunise nuna esposición

26 años depués de la so esposición última, la obra del grupu ABRA torna a reunise nuna muestra. ‘ABRA. El reencuentro’ ye’l nome de la esposición que va tar abierta al públicu hasta'l 20 de xunu nel Edificiu Históricu de la Universidá d’Uviéu.

Emiliano Alonso, Pedro Pablo Alonso, Manolo Méndez, Ánxel Nava, Hugo O’Donell, Ástur Paredes, Vicente Pastor y María Jesús Rodríguez son les persones que conformaron esti grupu que nació nel 1980 “de la rebeldía d’unos mozos con munches ganes de camudar el mundu;de  mozos inquietos y profundamente cultos; de mozos inconformistes; con un ansia de llibertá que los llevó a xunise nunos tiempos nel que l’arte de vanguardia malpenes llegaba al común de los ciudadanos”, explica Esther Rodríguez Ortiz, comisaria de la esposición. Nesi primer momentu, ABRA taba formáu por siete persones –Pedro Pablo Alonso incorporaríase más alantre– que teníen la intención de crear un arte de calidá y vanguardia que tuviera un sellu asturianu marcáu. Asina, munchos de los autores apostaba pol usu de la llingua del país pa nomar a les sos creaciones.

La Escuela d’Artes Aplicaes d’Uviéu foi la sede de la primer esposición d’ABRA, nel añu 1981, a la que siguieron depués una itinerante per Asturies nel 1982 y otra nel xixonés Piñole y nel Muséu de Belles Artes esi mesmu añu; na Caxa d’Aforros d’Asturies en Bual (1983); y na Westbroadway Gallery de New York (1984), con continuidá n’otra itinerante pel país. Tres el viaxe a Estaos Xuníos, cada artista decidió buscase un poco a sí mesmu, pa finar l’actividá como grupu con una esposición nel añu 1987 nel Muséu de Belles Artes. Nestos 7 años d’actividá destaca la participación de dellos miembros nes Xornaes Pedagóxiques d’Asturies pa maestros y profesores.

Agora, los ocho miembros que conformaron ABRA tornen a xunise en ‘ABRA. El reencuentro’, una oportunidá pa que la xente más mozo pueda averase al trabayu d’estos artitstes que supunxeron un enantes y un depués na historia del arte asturianu contemporaneu. Esta muestra, entamada a iniciativa de la Universidá d’Uviéu como homenaxe a estos artistes, va poder visitase hasta’l 20 de xunu na sala d’esposición del Centru Cultural LAUDEO n’horariu de 11 a 14 hores y de 17 a 20.30 hores, de llunes a vienres.

Na semeya, integrantes del grupu ABRA nuna imaxe del añu 1987 (sacada del catálogu de la esposición).