La obra colos escritos d'un llabrador allandés del sieglu XIX centra la charra mensual d'Ástura

|
Juaco López

Juaco López va presentar nel Atenéu Obreru de Xixón 'Las nueve vidas de la casa de la Fuente de Riodecoba. Libro de memoria de una casa campesina de Asturias (1550-1864)'.

"Nun queríamos acabar l’añu ensin presentar esta obra, única n’Asturies nel so xéneru, que ye un testimoniu esceicional sobre la vida rural del occidente asturianu ente los sieglos XVI y XIX", espliquen dende l'asociación Ástura. Baxo'l títulu de 'Cultura y educación de un campesino asturiano', López va repasar les memories del allandés Rosendo María López Castrillón (1803-1864), llabrador nacíu en Riodecoba, llugar qu'anguaño pertenez a Eilao, sobre les que xira esti llibru editáu pola institución del que ye direutor, el Muséu del Pueblu d'Asturies.

Según anuncien, nos testos atópense "milenta datos ya hestories sobre la economía de la casa, el territoriu, el paisaxe; les rellaciones de parentexu, de vecindá, d’amistanza; les migraciones, la medrana al serviciu militar; les nueves plantes; les obres venceyaes a la construcción o a l'abridera de caminos; los oficios rurales, les fames; les rellaciones col poder eclesial y políticu; les estroces del osu; los fueos del monte; l’aprucimientu los mistos, etc". "La obra ruempe munchos de los llugares comunes qu'esisten sobre'l campesináu asturianu y amuesa l'importante papel que teníen la llectura y la escritura ente los campesinos asturianos de los sieglos XVIII y XIX. Los escritos de López Castrillón son ún de los documentos más interesantes qu'esisten pa conocer la realidá de la vida campesina asturiana, que tienen amás el valor de tar escritos direutamente por un llabrador. La so esistencia dexa bien ñidia la falta d'una hestoria rural d'Asturies y la inorancia que tenemos del nuestru pasáu rural", añaden.

La intervención de López, llicenciáu en Xeografía y Historia pola Universidad Complutense de Madrid y doctor en Xeografía y Historia pola Universidá d'Uviéu, ta prevista mañana a les 19.30 hores nel llar nuevu del Atenéu Obreru de Xixón, asitiáu na segunda planta de l'Antigua Escuela de Comerciu. La entrada ye llibre.

Contador Estadistiques