La Nueve actúa nuna 'sesión beermú' en Xixón

De baldre na cervecería Sr. Lúpulo.

El grupu folk ḷḷenizu abre los sos conciertos del 2017 en Xixón poco depués de cumplise un añu del so debú en Cenera. La Nueve surdió nel 2015 "como respuesta natural a la necesidá creativa d'un grupu comprometíu cola revalorización y reivindicación de la cultura popular asturiana", con recopilaciones recoyíes n’estudios del folclor ḷḷenizu, asturianu y d’otros llugares.

Mañana va poder sentise esta propuesta musical nel despachu de cerveces Sr. Lúpulo (San Antonio, 5), de magar les 13.30 hores, nun conciertu con motivu de la cercanía cola festividá irlandesa de St. Patrick (17 de marzu). La entrada ye de baldre.