“La nueva normalidá debería ser la oficialidá”, asegura Palacios

Podemos Asturies asoleyó un videu nel Día de les Lletres Asturianes nel que demanda “na nueva normalidá, oficialidá”. El diputáu Rafael Palacios considera que “volver al estáu anterior ye volver a un estáu d’anormalidá, onde les llingües d’Asturies son les úniques llingües del Estáu español que nun tienen reconocimientu oficial”.

Yolanda González Huergo, vocera del grupu municipal de Podemos-EQUO en Xixón, pon voz al videu, nel que xuega colos títulos de discos pa contar una historia que fina na demanda de la oficialidá “yá!”, aprovechando’l nome del trabayu de Felpeyu. Una iniciativa cola que la formación morada pretendió celebrar el Día de les Lletres Asturianes baxo’l lema “na nueva normalidá, oficialidá”.

“L’asturianu y el gallego-asturiano tienen que formar parte del procesu de reconstrucción social y económicu. La nueva normalidá debería ser la oficialidá, porque volver al estáu anterior ye volver a un estáu d’anormalidá, onde les llingües d’Asturies son les úniques llingües del Estáu español que nun tienen reconocimientu oficial”, aseguró Palacios. Podemos insiste en “abrir na Xunta Xeneral el debate pa la reforma del Estatutu d’Asturies col envís de declarar la oficialidá, que ye amás una obligación democrática”.