La nueche más curtia y con más conciertos

Nun ye novedá, pero si ye noticia qu'esti añu la nueche de San Xuan, que va ser el
próximu xueves 23, vuelve a ufiertanos conciertos del mayor interés per toa Asturies.
Xixón, Llugones, Uviéu o Corvera son dalgunos de los llugares que
tienen preparaos grupos y escenarios pa da-y la bienvenida simbólica al
branu.



Como yá dimos anuncia nesti diariu va tiempu, la nueche de San
Xuan en Xixón va tener l'honor d'acoyer la presentación en
directo del últimu trabayu discográficu de
Dixebra,
Ensin Novedá. Pero amás de
Dixebra en Xixón tamién va actuar La Col.la Propinde, el grupu
l.lenizu que ta preparando'l so segundu discu que tendría que tar na cai
pa últimos d'esti añu.



En Llugones van xuntase varies propuestes musicales bien estremaes, pero
con esperiencia abondo a la hora de montar folixa. L' Asociación
Sociocultural Beltain de Llugones, col sofitu del Conceyu de Siero, entama una
nueche qu'arranca ya de tarde cola actuación de bandes de gaites dende
les 18:00 hores, la entrega de los premios del premiu "Cuentos N'asturianu
sobre San Xuan" y una muestra de tonada con Jorge Tuya y Luis Estrada a
eso de les 21:30 hores. A les 22:30 hores van echar andar los conciertos
nocturnos col conciertu de la bandina La Galbana a les 22:30 hores. A les
00:15, y dempués de prender la foguera de la fiesta, va tocar
Shooglenifty, la banda escocesa con ocho
discos nel so haber y reconocimientu a nivel mundial, ye una de les bandes
más importantes del panorama folk internacional liderada pol
célebre vigulinista
Angus Grant.
P'acabar la nueche l'estilu musical da un xiru importante cola actuación
de Los Berrones.



Una de les cites clásiques d'esta nueche ye siempre Corvera. La
que foi una de les nueches folk más importantes d'Asturies, xuntando a
decenes de miles de persones, careció l'añu pasáu'l
despreciu por parte del Conceyu de Corvera, quedando reducida l'añu
pasáu a un programa muncho más modestu que n'ediciones pasaes.
Anguaño, paez que se quier volver a retomar lo que yá yera un
éxitu, y pa esta nueche de San Xuan tán programes les actuaciones
de cuatro grupos folk asturianos. A partir de les 23:00 la música va
arrancar colos veteranos y incombustibles Lliberdón, y tres de la
foguera va xubir al escenariu, Llangres,
La Tarrancha y Batulax.



Uviéu pela so parte vuelve a centrar los actos na plaza la
catedral. Dende les 20:30 van desfilar pel centru la ciudá agrupaciones
folclóriques. A les 22:30 va tocar na plaza la catedral el gaiteru
ganador del Memorial Remis Ovalle clasificáu pa representar a Asturies,
xunta otros trés gaiteros, nel concursu de gaiteros Macallan del
Festival Intercélticu de Lorient. Darréu d'entregar los premios
del "Concursu d'Enramáu de Fontes", sobre les 23:00 hores,
Teatro Margen va facer un espectáculu de teatru de cai que va finar
cuando prenda la foguera a les doce la nueche. Al poco de prender, sobre les
00:15, va ser el folk de Tejedor el que
pieslle esta nueche.