La Nueche d’Ánimes, una tradición de nueso

El sábadu ye la Nueche d’Ánimes o Difuntos, una xornada mui presente na nuesa tradición anque anguaño contaminada pola so versión estauxunidense: Halloween. Esti añu esta folixa de raigón celta na que los espíritus de los muertos tornen al mundu de los mortales ta marcada, como tou, pola pandemia de COVID-19.

El Samhain o Nueche d’Ánimes, como se conoz n’Asturies, ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Son munchos los rituales que se faen esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, que se solíen colocar nos cruces de camín nel pasáu. Pa conocer un poco más d’esta tradición recordamos esta crónica de la charra ‘El Día Difuntos na tradición asturiana’, entamada pola Lliga Celta d’Asturies, que punxo Alberto Álvarez Peña.

Esti añu les celebraciones que se veníen entamando en dellos llugares del país pola Nueche d’Ánimes queden suspendíes pola situación sanitaria pola pandemia de COVID, anque los rituales tradicionales van siguir faciéndose de forma individual. Les visites a los cementerios de mañana, Tolos Santos, tamién tán llendaes, con controles d’accesu pa evitar axuntamientos importantes de xente qu’acude a visitar a los sos familiares nos campusantos.

¿Cómo celebres tu la Nueche d’Ánimes? Nesti reportaxe de ‘A la Gueta los Suaños’ tamién pues garrar delles idees.