“La novela ‘Flora’ ye un homenaxe a una muyer, pero tamién a munchos tipos de muyeres”, esplica Faustino Álvarez

|
Xuan Bello, Faustino Álvarez y Esther Prieto presentación 'Flora'

Faustino Álvarez ta acabante d’espublizar ‘Flora’, “un novelón decimonónicu y bonísimu”, como la definió Esther Prieto, d’Ediciones Trabe. “Ye un homenaxe a una muyer, pero tamién a munchos tipos de muyeres”, esplicó l’autor, que tuvo esti martes acompañáu na presentación del llibru en Xixón de Xuan Bello.

El de Paniceiros recordó que Álvarez, magar qu’ésta sía la so primer obra de ficción, “nun ye un desconocíu, tien títulos fundamentales na lliteratura asturiana”, como ye’l casu de ‘Del aráu a la pluma. Antoloxía d’una poesía en bable’ (1977) que previamente citara tamién Prieto. La responsable de la editorial celebró esti asoleyamientu “pola propia novela, yá que tengo gustos lliterarios poles noveles decimonóniques, y porque abre un camín na narrativa asturiana, el dar voz a otres muyeres que nun la tuvieren nel so día que sí se dio na poesía o en trabayos de Paquita Suárez Coalla, Vanessa Gutiérrez o Beatriz Viado”.

“Intenta contar la historia d’una muyer dende un pensamientu que s’avera al pensamientu feminista, nuna época onde’l feminismu ye naciente”, rescampló Bello. “Fala de la memoria familiar, la memoria que les families va treslladando d’unos a otros, xeneración a xeneración, na vitalidá, nel valor, nel salir alantre”, siguió l’escritor, que definió al personaxe de Flora como “cautivador”.

De la obra tamién quixo destacar que “ta escrito con una llingua riquísima, clara, hermosamente estándar”, na que debaxo se dexa ver “el dialeutu d’Urbiés, el dialeutu del valle del Turón”.

De Jesús Ibáñez a la so madre Flora

Depués de les dos introducciones, Álvarez garraba la pallabra nel actu celebráu nel Atenéu de Xixón, segunda presentación depués de la del día anterior n’Uviéu, nel Club Prensa Asturiana. Les primeres foron pa Bello, “gran maestru de la lliteratura asturiana que siento nun sía más reconocíu n’Asturies”, y pal so ‘Hestoria universal de Paniceiros’, “qu’abriól’l camín pa que pudiera llegar esta ‘Flora’. Ensin Paniceiros nun habría esta obra”, aseguró.

Históricu de Conceyu Bable y primer responsable de Política Llingüística, como recordó previamiente Prieto, siguió dando detalles sobre la so vida, dende que nació n’El Pedreru, n’Urbiés, hasta que llegó a escribir una novela que llevaba “más de 45 años na mio cabeza ensin sabelo”. “Descubrí por casualidá un personaxe qu’escribió unes memories, turbulentes, fía d’una muyer d’Urbiés: Jesús Ibáñez. Yera conflictivu, revolucionariu, tuvo na guerra, llevábase mal con unos y colos otros y esilióse en México. Pero cuando falaba de la madre yera otru, yera tenrura y delicadeza, lo que me sorprendió gratamente”.

Un descubrimientu que fixo a Álvarez entrugase “ónde salieron aquellos paisanos de los años 30 tan aguerríos, fuertes, que llucharon por cambiar el mundu y sorprendieron a media Europa” y “quiénes yeren les sos madres, les sos hermanes… Eses otres muyeres, les de la mio familia, les vecines”.

Cola xubilación, l’autor púnxose a escribir sobre Ibáñez “pero salíenme les voces d’eses muyeres”, lo que lu llevó a centrar la historia “na propia madre, de la que naide sintió falar d’ella n’Urbiés” depués de “empezar a poner por escritor lo qu’eses voces taben diciéndome”. Eses primeres escritures yeren en castellanu, “pero al revisar el testu les voces nun cuadraben, polo qu’empecé a facer otru n’asturianu”.

“Taba faciendo una impostura, una desllealtá a aquelles muyeres. Cuando cambién’l rexistru, cuando escribo lo que creo que podíen dicir, aquello salió solo. Sólo tenía que copiar”, confesó Álvarez.

Una historia de xente humilde

Sobre la novela, apuntó que ye “una ficción, pero que ta filbanada de munches histores llariegues; estrada de viviencies personales, non sólo míes, sinón tamién d’amigues. Una historia humilde de xente humilde y apasionada pola vida y lo propio, entregada a la defensa de la xusticia y la llibertá”.

“Fala de la nuesa xente”, sigue, “d’un sitiu que pue ser cualquier pueblu asturianu; d’una muyer, pero que pueden ser munches, que llevaben una vida digna pa los suyos pero pa elles mesmes tamién, porque, de dalguna manera, asina la vida será meyor pa toos. Ye un homenaxe a una muyer, pero tamién a munchos tipos de muyeres”.

Na semeya, Bello, Álvarez y Prieto ayeru na presentación nel Atenéu Obreru de Xixón.

Contador Estadistiques