La nieve obliga a zarrar El Counio y al usu de cadenes en seis puertos

Asturies ta viviendo nevaes fuertes estos díes, tando n’alerta mariella la parte central y oriental del cordal y en naranxa la mariña por fenómenos costeros. Sicasí, la nieve cayida obligó a cortar el pasu de vehículos n’El Counio, siendo obligáu l’usu de cadenes n’otros seis puertos de la rede asturiana de carreteres.

El pasu ente La Venta y Cecos nun ye posible per El Counio, siendo la vía única zarrada al tráficu xunto al tramu de carretera de la LN-8 de Tuíza al puertu de La Cubieḷḷa. Ye obligáu l’usu de cadenes en San Isidro, Ḷḷeitariegos, Tarna, Zarréu, Somiedu y Ventana, mentes que nun pueden circular vehículos pesaos pela vía PI-10 ente Boriñes y Sieres, y pela AS-258 ente Colunga y L’Infiestu, nestos casos por argayu.

L’alerta mariella por nieve decretada pola Axencia Estatal de Meteoroloxía (Aemet) va durar tola tarde, cola cota asitiada a 800 metros. Tamién va tar n’alerta la mariña por fenómenos costeros tol día, naranxa hasta les 20 hores y mariella hasta la medianueche.

Ayeri llegaron a algamase raches d’aire d’hasta 132 quilómetros per hora en Cabu Bustu y foles de casi 6 metros en Xixón en baxamar. Mañana la situación na mar va estabilizase.

L’agua, sicasí, va siguir nos díes próximos, con un tregua posible mañana. Les temperatures van ser asemeyaes a les de güei.

Pue consultar en direuto l'estáu de les víes asturianes calcando nesti enllaz.