La nieve complica les comunicaciones

Per tierra, mar y aire, en tren o en coche, les comunicaciones n’Asturies tán viéndose afeutaes pola nieve, que va siguir nos díes próximos, previsiblemente hasta’l domingu. El xueves comenzó una borrasca que va provocar nevaes a nivel de la mar.

La conexón principal cola Meseta per carretera, l’autopista d’El Güerna, tuvo zarrada esta mañana hasta les 12.30 hores por falta de visibilidá. Nesi momentu, abrióse, pero sólo pa vehículos con neumáticos d’iviernu, y una hora depués namái nun pueden salir del país los camiones; tamién pel puertu Payares, onde los turismos necesiten usar cadenes pa circular. Al rodiu de les 16 hores, volvióse a prohibir n'El Güerna'l pasu de coches ensin ruedes especiales d'iviernu.

Otra manera, hai 19 puertos zarraos y n’otros 10 ye obligatoriu l’usu de cadenes, que se pueden consultar al momentu calcando nesti enllaz. No que se refier a carreteres, tán cortaos 9 tramos.

La nieve tamién provocó problemes nel tránsitu de los trenes, con retrasos y conexones suspendíes, y nel tráficu aereu, nesti casu pola situación d'otros aeropuertos. Asina, l’Adolfo Suárez Madrid-Barajas tuvo una pista zarrada, xenerando tamién retrasos nes sos conexones con Asturies.

Alerta naranxa

El fríu, l’agua y la nieve van ser comunes pa les asturianes y asturianos hasta’l domingu, cuando habrá una meyoría del tiempu. Esta tarde ta previsto que sigan les nevaes, llegando a ser a nivel del mar na madrugada.

L’Axencia Estatal de Meteoroloxía (Aemet) apunta que la causa d’esta situación vien pola influencia d’una área de presiones baxes centraes sobre’l sureste peninsular y la presencia d’aire mui fríu tanto en niveles baxos como en niveles medios de l’atmósfera. Esta configuración favorez la entrada de vientos húmedos del este sobre’l cuadrante noreste y zona centru peninsulares, lo que xunto cola presencia del aire frío, favorez les lluvies en forma de nieve en cotes baxes en zones amplies de la Península, ente elles los territorios cantábricos pol fluxu d’aire frío y húmedu procedente del norte, situación que va caltenese al menos mañana y pasao.

Esta tarde Asturies va tar n’alerta naranxa por nevaes na zona central y oriental, a esceición de la mariña, mentes que va ser mariella nel suroccidente y na mar, nesti casu por fenómenos costeros. L’avisu va caltenese mañana menos na mar, anque mariellu pa toes estes zones, al igual que’l miércoles, cuando’l riesgu va tornar al Cantábricu.

Dada la situación, el Serviciu d’Emerxencies del Principáu d’Asturies (SEPA) recomienda a la población que tomen precauciones, sobre manera si va a viaxar, asina como col usu en viviendes de braseros, estufes, carbón o gas. D’igual manera, afala a persones d’edá avanzada a nun salir a la cai, al igual qu’a los padres a sacar a neñes y neños de casa.