La negociación pol pautu de Gobiernu sigue allancada nel tema del asturianu

La Federación Socialista Asturiana (FSA-PSOE) y Izquierda Xunida-Bloque por Asturies-Los Verdes (IU-BA-LV) aconceyaron esti martes pa continuar cola negociación con vistes a la formación de gobiernu. La Federación Socialista Asturiana declaró al traviés d'un comunicáu que la negociación ta nuna fase "mui avanzada" de manera que se cuenta con rematar pa la reunión de güei miércoles el testu del alcuerdu de Gobiernu pa pasar darréu a la negociación sobre'l repartu d'estayes de gobiernu y puestos. El representante d'IX-BA-LV y y viceconseyeru de Bienestar Social en funciones, Angel González declaró nesti sentíu que "la estructura de gobiernu tien un papel importantísimu pa decidir cómo va executase'l programa".

Ello ye que la FSA va presentar güei una primer propuesta sobre repartu de organigrama de gobiernu que va centrar el debate, anque fontes consultaes por Asturies.com esplicaron qu'entovía queden por pesllar cuestiones programátiques, ente elles la del tratamientu de la políitica llingüística nel pautu de gobiernu, un tema especialmente difícil na negociación, nel que les posiciones de dambes partes nun se movieron un rispiu dende l'aniciu del diálogu y nel qu'ayeri tampoco consiguieron desbloquiar la situación. Asina ye que, anque la cuestión de la oficialidá va tratase na negociación pa la reforma estatutaria, pela parte socialista llegó a cuestionase la validez de la llexislación sobre l'asturianu, echándose al pie del recursu -entovía nun almitíu- d'un xuez sobre la constitucionalidá de dellos artículos de la Llei d'Usu del asturianu de 1998. Anque los términos concretos en que ta desarrollándose'l debate nun trescendieron y too depende de los documentos y propuestes que van presentase güei, una de les aspiraciones d'IX-BA-LV nesti terrén sedría que la Oficina de Política Llingüística xubiere d'estatus pa convertise en Dirección Xeneral.

El día de güei pue ser clave pa les polítiques de normalización del asturianu, ello dempués d'una xornada na que la llingua volvió a ser llugar d'enfrentamientu ente les partes.

El tiempu cuerre mientres la negociación avanza con dificultaes, y la Xunta Xeneral yá tien puesta fecha pa la investidura de presidente, celebrándose les sesiones de debate d'elección los próximos díes xueves 5 y vienres 6 de xunetu.

Pela so parte militantes de la Xunta pola Defensa de la Llingua Asturiana, encabezaos pola "Pita", realizaron una protesta delantre de la sede de la FSA, llugar onde aconceyaron esta mañana les delegaciones del PSOE y IX pa continuar les negociaciones del pactu de gobiernu. "La oficialidá ye irrenunciable" o "la oficialidá nun ye un cromu" yeren dalgunos de los lemes escoyíos pa esta protesta.