La necropsia practicada al osu pardu de Mual confirma que la muerte foi por un disparu

El cadabre del animal, un adulto machu mozu de 102 quilos, atopóse’l pasáu día 9.

La necropsia practicada al osu pardu cantábricu atopáu en Mual (Cangas del Narcea) confirma que la so muerte foi por una hemorraxa interna intensa causada por un disparu d’arma de fueu.

L’exame, dirixíu por Juan Francisco García Marín, catedráticu d’Anatomía Patolóxica de la Facultá de Veterinaria de la Universidá de Llión, señala que’l proyectil entró pel costazu esquierdu del exemplar, al altor de la docena costiella, y aparó nel fégadu “provocando una hemorraxa interna intensa, que se produciría de forma progresiva, y posible shock hipovolémicu”.

El cadabre del animal, un adultu machu mozu de 102 quilos de pesu, atopóse na tarde del 9 de setiembre y la necropsia llevóse a cabu a la otra mañana, el 10 de setiembre, na Facultá de Veterinaria de Llión. Los especialistes consideren que’l plantígradu morrió ente les 6:00 y les 13:00 hores del día 9.

L’estudiu, nel que tamién participaron veterinarios de la Dirección Xeneral de Recursos Naturales y del Serviciu Rexonal d’Investigación y Desenvolvimientu Alimentariu (Serida), reflexa que l’osu morrió ente una y dos hores depués de recibir el disparu.