La Navidá trai trés obres de teatru n'asturianu pa neñes y neños

'Reciella. Families pol Asturianu' entama un añu más Escenines pa la Reciella, festival d'artes escéniques de baldre con sede en Xixón.

Dende l'añu 2013 vien celebrándose toles Navidaes esta iniciativa qu’añu tres añu algama ésitu, como amuesen los aforos completos en toles sos actividaes o que na última convocatoria, con restricciones pola COVID-19, escosárense toles entraes en menos de 48 hores. Esta edición caltién el patiu del Centru de Cultura Antiguu Institutu como sede de les funciones, siempre a les 19 hores, con entrada llibre hasta completar places.

La primera de les trés obres en representase va ser el martes 27 ‘El viaxe de Covaletti’, d’Higiénico Papel Teatro, una producción que mereció nel 2020 el Premiu Nel Amaro de Teatru Profesional en Llingua Asturiana y Gallego-asturiano. Al día siguiente va ser el turnu de Saltantes Teatro, que va poner n’escena ‘El gorrumbu’ –estrena n'asturianu–, encamentada pa mayores de 6 años, mentes que va pesllar esta edición el xueves 29 Carlos Alba colos títeres ‘El trasgu y el molineru’.

El diseñu del cartelu d'esta edición d'Escenines pa la Reciella torna a ser obra de David G. Ferrero y nél rescampla la mascota del festival, una mustadiella que nesta ocasión apaez llevando una maleta.