La música va ser protagonista na XII Sumana de las Ḷḷetras Asturianas de Cangas

|
Logu de la XII Sumana de las Ḷḷetras Asturianas de Cangas

Prográmense actividaes diaries de sábadu a sábadu, con espaciu tamién pa la poesía, el teatru, l'arte y un taller pa la reciella.

El Conceyu Cangas, al traviés de la Conceyalía de Cultura, recupera esti añu, depués del parón obligáu del pasáu, la so Sumana de las Ḷḷetras Asturianas. Siete díes dedicaos a la nuesa cultura col fin de poner en valor la llingua asturiana.

Esti añu la música tien un protagonismu especial na programación. Mañana, a les 19.30 hores nel Teatru Toreno, Slum Suit va ufrir un conciertu de jazz, mentes que'l miércoles el turnu va ser pa L-R y el vienres pa Cristina Gestido (viola) y Mario Bernardo (pianu) con 'Canciones asturianas' d'Antón García Abril, actuación na qu'Alfredo González va facer llectura declamada de los testos de Delestal y na qu'Ezequiel Sebastian va encargase de l'ambientación visual.

La poesía y el teatru tamién van tener acompañamientu musical. El xueves intervién El Velcro, proyeutu de pallabra falada electrónica col poeta Pablo X. Suárez y el multiinstrumentista Dudu García, y el sábadu, nesti casu a les 12 hores, preséntase la obra 'Soñar...!', de Gema Álvarez Arbas, cola aportación musical de Fátima y Tom Prendes.

Nesta sesión que va poner el ramu a la Sumana tamién se va proceder a la entrega de premios del XVIII Concursu de Cuentos Curtios del Conceyu Cangas y del XII Concursu de Cuentos Curtios Otilio Álvarez Rodríguez.

Esposición na Casa Cultura

El martes, a les 19.30 hores, va inaugurase la esposición 'Evoluciones y requexos' d'Adolfo Manzano, que se va poder visitar na Casa Cultura Palaciu d'Oumaña hasta'l 14 de xunu. Los visitantes van poder ver pintures d'arte contemporaneu de paisaxes "mui venceyaos al estáu d'ánimu de la persona que los contempla", amás d'una escultura de madera de castañar.

Mentes, les neñes y neños va poder apuntase a un taller que se va desenvolver el llunes, a les 18 hores, nel Aula Concha'i Tresmonte. Va ponelu Aladanza Educación y Tradición y tien el nome 'Vistiéndonos cumo antano'.

Toles actividaes son de baldre, pero ye necesario acutar previamente entrada p'asistir dada la situación sanitaria pola pandemia de COVID-19.

Contador Estadistiques