La música del gaiteru irlandés Eoin Dillon llega a Xixón

El gaiteru irlandés Eoin Dillon va presentar esti xueves 22 de febreru en Xixón el so discu "The Third Twin" el primer trabayu en solitario d'esti gaiteru que formó parte de la conocida banda "Kila". La cita va ser a les 8 de la tarde nel Centru Cultural Colexata San Xuan Bautista.


"The Third Twin" presenta diez pieces instrumentales, de les qu'ocho son composiciones del mesmu Eoin Dillon. La casa promotora d'esti artista empondera la "desnudez instrumental" del llabor d'esti artista nacíu en Dublín. Ebanista primero de metese a Luthier de gaites, Dillon toca la Uillean pipe (gaita irlandesa) qu'el mesmu construyó, anque si ye conocíu del públicu ye pol so pasu pel grupu Kila, una de les bandes más elegantes y personales de la "world music". Pa l'actuación del xueves, Dillon va contar cola collaboración d'un de los músicos colos que grabó'l discu, el bouzouki de Frank Tate.