La música de Felpeyu visita Samartín d'Ozcos

Un grupu de moces y moces d'esti conceyu occidental trabayen nuna iniciativa pa dar vida cultural al so pueblu. Esti fin de selmana una d'eses actividaes lleva a Felpeyu a actuar nel Hotel La Marquesita de Samartín.

Esta iniciativa lleva'l nome "Cultura contra el olvido", y al traviés d'ella un bon garapiellu de mozos y moces de Samartín d'Ozcos quieren que la so casa seya tamién un llugar onde vivir y disfrutar d'actividaes culturales de toa triba, y nun tener que dir hasta Uviéu o Ribadeo pa poder asistir a elles, como nos comenta Nacho, ún de los promotores de la idega. El proyectu lleva en marcha cuatro meses, y hasta agora llevaron hasta ellí a músicos como Nacho Vegas, Pedru Pereira o poetes como David González o Vicente Muñoz. Cola llegada del iviernu les actividaes van dar un pequeñu parón, anque enantes hai preparada una bona sesión de folk pa pesllar l'añu. Ello ye qu'esti sábadu a partir de les 23:00 hores va tocar el grupu xixonés de folk Felpeyu. La entrada ye de baldre, y el conciertu va ser nel Hotel La Marquesita, que sirve como abellugu habitual d'esta iniciativa, qu' amuesa como la cultura ye una de los meyores maneres que tien un pueblu de dar vida y reclamar el so puestu nel mundu.