La música asturiana reclama un añu más la oficialidá del asturianu

Per ventenu novenu añu siguíu, artistes y bandes de música del país de dellos estilos xúnense esti sábadu pa reclamar los derechos llingüísticos d’asturianos y asturianes. Xuegos pa neños, la presentación del cantar nuevu de 'Reciella. Families pol Asturianu' y actuaciones conformen el XXIX Conciertu pola Oficialidá.

La Xunta pola Defensa de la Llingua Asturiana (XDLA) entama esta celebración qu’axunta reivindicación y folixa, y na que tolos grupos participen de forma desinteresada. Esti añu’l llugar escoyíu ye’l xixonés Parque de los Hermanos Castro, más conocíu como’l Parque Inglés, y va contar coles actuaciones estrella de Rodrigo Cuevas, que s’estrena na cita, y de Dixebra, de xira con motivu del so trentenu aniversariu y que va sumar, con ésta, 26 presencies nel eventu.

L’actividá nel llugar va dar comienzu a les 17 hores, cuando’l recién estrenáu espaciu yerbatu El Rellugu va entamar xuegos infantiles. A les 18 hores, ‘Reciella. Families pol Asturianu’ va presentar el cantar ‘N’asturianu, sumes más’, col que van promocionar el V Día de la Reciella, que va celebrase’l 1 d’ochobre nel Muséu del Pueblu d’Asturies.

El so autor ye David Varela y el direutor del videu, Pablo Quiroga, que repite tres l’ésitu del añu pasáu con ‘Entaína’, canción compuesta por Skama la Rede con lletra de David Guardado. Neños y neñes de Reciella van xubir al escenariu pa facer una coreografía col cantar de la edición d’esti añu.

Tres estes actividaes previes, los primeros n’actuar van ser la Banda Gaites LaKadarma, pa depués dexar pasu a la Tarde en Danza que van protagonizar Caldo y Os Rabizos, Herbamora y Cantaruxare. La folixa va siguir col espectáculu de Rodrigo Cuevas y col rock de Spanta la Xente y Dixebra, siendo los encargaos de zarrar la cita Misiva.

Entraes

Les entraes pal XXIX Conciertu pola Oficialidá tán a la venta de forma anticipada a un preciu de 8 euros, mentes que na puerta van costar 10. Éstes pueden mercase nos llugares siguientes: Sidrería Canteli y Trisquel (Xixón); L'Esperteyu y Malá Strana (Uviéu); El Cafetón (Avilés); L'Abellugu (Mieres); La Palmera (La Pola Ḷḷena); CSA La Semiente (L'Entregu); Pub Creisi (Candás); El Judá Rock Bar (La Pola Siero); Llibrería Las Dos Vías (Grau); y Bar Azul (Cangas).